جورہاٹ:آپریشن سیندور میں ہزیمت اٹھانےوالے بھارتی پائلٹس کی نااہلی ابھی تک برقرار ہے ، جس کے نتیجے میں ایک اور جنگی طیارہ گر کر تباہ ہو گیا ہے۔

بھارتی میڈیا رپورٹس کے مطابق یہ واقعہ شمال مشرقی ریاست آسام کے شہر جورہاٹ میں پیش آیا جہاں ہفتے کی صبح بھارتی فضائیہ کا ایک اے این-32 ٹرانسپورٹ طیارہ لینڈنگ کے دوران ایئر فورس اسٹیشن کے احاطے میں گر کر تباہ ہو گیا، جس کے بعد طیارے میں شدید آگ بھڑک اٹھی۔

رپورٹس کے مطابق یہ حادثہ اُس وقت پیش آیا جب اے این-32 اینٹونوو طیارہ لینڈنگ کے دوران ایئر فورس اسٹیشن کے اندر ہی گر گیا،جس کے فوراً بعد طیارے میں آگ لگ گئی۔جبکہ واقعے کے بعد امدادی اور ہنگامی ٹیمیں فوری طور پر جائے حادثہ پر پہنچ گئیں اور آگ بجھانے اور صورتحال کا جائزہ لینے کا عمل شروع کر دیا گیا۔

میڈیا رپورٹس کے مطابق تاحال حادثے کی اصل وجہ معلوم نہیں ہو سکی ہے جبکہ کسی بھی جانی یا مالی نقصان سے متعلق تفصیلات بھی سامنے نہیں آئیں۔

دوسری جانب بھارتی فضائیہ نے واقعے کی تصدیق کرتے ہوئے کہا ہے کہ صورت حال کے مکمل جائزے کے بعد مزید معلومات فراہم کی جائیں گی۔ فضائیہ کے مطابق حادثے کی تحقیقات بھی شروع کر دی گئی ہیں۔

خیال رہے کہ اے این-32 اینٹونوو ایک مضبوط دو انجنوں والا ٹربوپروپ فوجی ٹرانسپورٹ طیارہ ہے جسے بھارتی فضائیہ کا “ورک ہارس” بھی کہا جاتا ہے۔یہ طیارہ اصل میں سوویت یونین نے بھارت کی ضروریات کے مطابق تیار کیا تھا اور بھارتی فضائیہ کے پاس اس وقت اس کے تقریباً 100 طیاروں پر مشتمل بیڑا موجود ہے۔

دفاعی ماہرین کے مطابق یہ طیارہ انتہائی مشکل حالات، خصوصاً بلند پہاڑی ایئر فیلڈز اور گرم مرطوب موسم میں بھی آپریشن کی صلاحیت رکھتا ہے۔

واضح رہے کہ بھارتی ائیرفورس میں طیارہ حادثہ کا یہ پہلا واقعہ نہیں اس سے پہلے بھی سینکڑوں طیارے حادثے کا شکار ہو چکے ہیں جس میں درجنوں پائلٹس اپنی جانیں گنوا چکے ہیں۔