اسلام آباد: پاکستان تحریک انصاف کے بانی چیئرمین عمران خان کو سپریم کورٹ کے حکم پر طبی معائنے کے لیے اڈیالہ جیل سے شفا انٹرنیشنل اسپتال منتقل کردیا گیا ہے، جہاں ماہر ڈاکٹروں کی ٹیم ان کا طبی معائنہ کرے گی۔

اسپتال ذرائع کے مطابق عمران خان کا ابتدائی معائنہ ہنگامی شعبے میں کیا جائے گا، جس کے لیے 6 ماہر ڈاکٹرز پر مشتمل ٹیم تشکیل دی گئی ہے۔ طبی معائنے کے بعد ڈاکٹرز یہ فیصلہ کریں گے کہ انہیں اسپتال میں داخل کرنے کی ضرورت ہے یا نہیں۔

ذرائع کا کہنا ہے کہ عمران خان کو اسپتال میں داخل کیے جانے کی صورت میں بھی خصوصی انتظامات مکمل کرلیے گئے ہیں۔ وفاقی حکومت کی جانب سے اسپتال کے ایک حصے کو سب جیل قرار دینے کے حوالے سے بھی انتظامات کیے گئے ہیں، تاکہ ضرورت پڑنے پر ان کی سکیورٹی اور نگرانی کے لیے اضافی اقدامات کیے جاسکیں۔

عمران خان کی اڈیالہ جیل سے شفا انٹرنیشنل اسپتال منتقلی کے موقع پر وفاقی حکومت اور اسلام آباد کی ضلعی انتظامیہ کی جانب سے سکیورٹی کے غیر معمولی انتظامات کیے گئے۔ اسپتال کے اطراف پولیس کی بھاری نفری تعینات کی گئی جبکہ داخلی اور خارجی راستوں پر بھی سکیورٹی بڑھا دی گئی۔

اس سے قبل انسپکٹر جنرل اسلام آباد پولیس نے دیگر پولیس افسران کے ہمراہ شفا انٹرنیشنل اسپتال کا دورہ کیا اور وہاں کیے گئے سکیورٹی انتظامات کا جائزہ لیا۔

اسپتال کے باہر بھی پولیس اہلکاروں کی بڑی تعداد تعینات رہی، جبکہ شفا انٹرنیشنل اسپتال کے قریب سڑک کے کنارے کھڑی گاڑیوں کو لفٹرز کی مدد سے ہٹا دیا گیا تاکہ سکیورٹی اور آمدورفت کے انتظامات میں کوئی رکاوٹ پیدا نہ ہو۔