ہنگو: خیبر پختونخوا کے ضلع ہنگو میں خزینہ بانڈہ چیک پوسٹ پر بھارتی حمایت یافتہ خارجیوں کے حملے کو پولیس نے بروقت کارروائی کرتے ہوئے ناکام بنا دیا۔ شدید فائرنگ کے تبادلے میں آٹھ شرپسند مارے گئے جبکہ ڈی ایس پی دیار خان شہادت کے درجے پر فائز ہوگئے۔

پولیس ترجمان کے مطابق حملے کے بعد پولیس نے فوری جوابی کارروائی کی، جس کے نتیجے میں آٹھ حملہ آور ہلاک ہوگئے۔ فائرنگ کے تبادلے کے دوران ڈی ایس پی دیار خان نے بہادری سے مقابلہ کرتے ہوئے جان کا نذرانہ پیش کیا، جبکہ ان کے ہمراہ متعدد پولیس اہلکار زخمی بھی ہوئے۔

ڈسٹرکٹ پولیس آفیسر (ڈی پی او) نے بتایا کہ آپریشن کے دوران ڈی ایس پی مجاہد حسین سمیت مجموعی طور پر 18 پولیس اہلکار زخمی ہوئے، جنہیں فوری طور پر قریبی ہسپتال منتقل کر دیا گیا، جہاں انہیں طبی امداد فراہم کی جا رہی ہے۔

پولیس حکام کے مطابق علاقے میں دہشت گردوں کے خلاف کارروائی بدستور جاری ہے، جبکہ سیکیورٹی فورسز نے علاقے کا محاصرہ کرکے سرچ آپریشن مزید تیز کر دیا ہے تاکہ ممکنہ طور پر فرار ہونے والے حملہ آوروں اور ان کے سہولت کاروں کو گرفتار کیا جا سکے۔

اعلیٰ پولیس حکام کا کہنا ہے کہ زخمی اہلکاروں کو بہترین طبی سہولیات فراہم کی جا رہی ہیں، جبکہ شہید ہونے والے افسر کی قربانی رائیگاں نہیں جانے دی جائے گی۔ انہوں نے اس عزم کا اظہار کیا کہ دہشت گرد عناصر کے خلاف کارروائیاں پوری قوت کے ساتھ جاری رہیں گی تاکہ علاقے میں امن و امان کو یقینی بنایا جا سکے۔