ویب ڈیسک:اگر آپ کسی نئے شہر میں راستہ تلاش کر رہے ہوں یا اپنے ہی علاقے میں کسی مقام تک پہنچنا چاہتے ہوں تو گوگل میپس لاکھوں افراد کی پہلی ترجیح بن چکا ہے۔ تاہم کیا آپ نے کبھی غور کیا کہ گوگل میپس پر نظر آنے والا نیلا نقطہ (Blue Dot) کبھی بڑا اور کبھی چھوٹا کیوں ہو جاتا ہے؟

رپورٹس کے مطابق گوگل میپس میں دکھائی دینے والا بلیو ڈاٹ دراصل صارف کی موجودہ لوکیشن کی نمائندگی کرتا ہے۔ بعض اوقات یہ ایک چھوٹے نقطے کی شکل میں نظر آتا ہے، جبکہ کبھی اس کے گرد نیم شفاف نیلا دائرہ بن جاتا ہے جو وقتاً فوقتاً بڑا یا چھوٹا ہوتا رہتا ہے۔

ماہرین کے مطابق یہ تبدیلی کسی خرابی کی نشاندہی نہیں بلکہ اس بات کا اشارہ ہوتی ہے کہ گوگل میپس آپ کی موجودہ لوکیشن کے بارے میں کتنا پراعتماد ہے۔

اسمارٹ فون آپ کی لوکیشن کا تعین جی پی ایس سیٹلائٹس، موبائل ٹاورز اور قریبی وائی فائی نیٹ ورکس کی مدد سے کرتا ہے۔ جب یہ تمام سگنلز مضبوط اور درست ہوں تو گوگل میپس آپ کی انتہائی درست (Pinpoint) لوکیشن دکھاتا ہے، جس کی وجہ سے بلیو ڈاٹ چھوٹا رہتا ہے۔

تاہم اگر جی پی ایس یا دیگر سگنلز کمزور ہوں یا ان میں رکاوٹ ہو تو ایپ آپ کی درست جگہ کا اندازہ نہیں لگا پاتی۔ ایسی صورت میں بلیو ڈاٹ کے گرد بڑا نیم شفاف دائرہ ظاہر ہوتا ہے، جو اس بات کی نشاندہی کرتا ہے کہ آپ اس دائرے کے اندر کہیں موجود ہیں، مگر درست مقام کا تعین ممکن نہیں۔

یعنی اگر گوگل میپس پر بڑا بلیو ڈاٹ نظر آئے تو اس کا مطلب خرابی نہیں بلکہ لوکیشن کی کم درستگی ہے، جبکہ چھوٹا بلیو ڈاٹ اس بات کی علامت ہے کہ ایپ کو آپ کی موجودہ جگہ کا درست اندازہ ہے۔