اسلام آباد: عالمی ٹیکنالوجی کمپنی گوگل نے پاکستان میں اپنے باقاعدہ آپریشنز کے آغاز کے موقع پر پاکستانی طلبہ کے لیے بڑی سہولت کا اعلان کرتے ہوئے جیمنائی پلس کی ایک سالہ مفت سبسکرپشن دینے کا اعلان کردیا۔

پاکستان میں گوگل کے مقامی دفتر کے باضابطہ آغاز کی تقریب میں کمپنی کے نائب صدر ولسن ایل وائٹ نے پاکستان کا دورہ کیا۔ اس موقع پر انہوں نے کہا کہ گوگل ایک دہائی سے زائد عرصے سے پاکستان میں سرمایہ کاری اور مختلف شعبوں میں تعاون جاری رکھے ہوئے ہے، جبکہ ملک میں مقامی دفتر کا افتتاح پاکستان کے ساتھ کمپنی کے طویل المدتی تعلق کا اہم سنگ میل ہے۔

گوگل کی جانب سے اعلان کردہ نئی اسکیم کے تحت اہل پاکستانی طلبہ کو جیمنائی پلس کی سہولیات ایک سال تک بلا معاوضہ دستیاب ہوں گی۔ تاہم کمپنی نے تاحال اس پروگرام میں شمولیت اور رجسٹریشن کے مکمل طریقہ کار اور اہلیت کی تفصیلات جاری نہیں کیں۔

گزشتہ برس طلبہ کے لیے گوگل کی جانب سے پیش کی جانے والی اسی نوعیت کی سہولت کو دیکھتے ہوئے امکان ظاہر کیا جارہا ہے کہ نئی پیشکش میں بھی طالب علم ہونے کے ثبوت اور تعلیمی ادارے سے متعلق معلومات جیسی شرائط شامل ہوسکتی ہیں۔ تاہم حتمی شرائط کا اعلان گوگل کی جانب سے باقاعدہ طور پر کیے جانے کے بعد ہی واضح ہوگا۔

پاکستان میں اس وقت جیمنائی پلس کی ماہانہ سبسکرپشن کی قیمت تقریباً 850 روپے بتائی جاتی ہے۔ اس حساب سے ایک سال کی سبسکرپشن کی مجموعی لاگت تقریباً 10 ہزار 200 روپے بنتی ہے۔ اس طرح اگر مفت سبسکرپشن پورے ایک سال کے لیے دستیاب رہی تو اہل طلبہ کو تقریباً 10 ہزار روپے کی بچت ہوسکتی ہے۔

طلبہ کو مشورہ دیا گیا ہے کہ گوگل کی جانب سے باضابطہ رجسٹریشن کا طریقہ کار جاری ہونے کا انتظار کریں اور کسی غیر سرکاری ویب سائٹ، مشکوک لنک یا غیر مصدقہ ذریعے پر اپنے گوگل اکاؤنٹ، تعلیمی ادارے یا دیگر ذاتی معلومات فراہم نہ کریں۔ٓ