ویب ڈیسک: گوگل اینڈرائیڈ صارفین کے لیے ایک ایسے نئے فیچر کی تیاری میں مصروف ہے جو فون کا ڈیٹا کلاؤڈ سروس استعمال کیے بغیر براہِ راست ونڈوز کمپیوٹر پر محفوظ کرنے کی سہولت فراہم کرے گا۔

رپورٹس کے مطابق یہ فیچر وائی فائی کے ذریعے کام کرے گا اور اس وقت خودکار بیک اپ لے گا جب اینڈرائیڈ فون اور ونڈوز پی سی ایک ہی نیٹ ورک سے منسلک ہوں گے۔ اس کے لیے صارفین کو اپنے کمپیوٹر پر Quick Share ایپ میں متعلقہ آپشن فعال کرنا ہوگا، جبکہ فون اور کمپیوٹر دونوں میں ایک ہی گوگل اکاؤنٹ سے لاگ اِن ہونا بھی ضروری ہوگا۔

اس سہولت کے ذریعے صارفین اپنی پسند کی تصاویر اور ویڈیوز منتخب کر سکیں گے، جن کا خودکار بیک اپ براہِ راست کمپیوٹر میں محفوظ ہو جائے گا، جس سے کلاؤڈ اسٹوریج پر انحصار کم ہو سکتا ہے۔

رپورٹ میں بتایا گیا ہے کہ ابتدائی مرحلے میں سام سنگ اسمارٹ فونز کو اس فیچر میں شامل نہیں کیا گیا۔ امکان ظاہر کیا جا رہا ہے کہ اس کی وجہ سام سنگ کی Smart Switch ایپ ہے، جو پہلے ہی ڈیٹا بیک اپ کی مختلف سہولیات فراہم کرتی ہے، اگرچہ اس میں خودکار بیک اپ کی سہولت موجود نہیں۔

رپورٹس کے مطابق سام سنگ کے علاوہ زیادہ تر اینڈرائیڈ ڈیوائسز کے لیے یہ فیچر متعارف کرایا جا سکتا ہے، تاہم گوگل نے اس حوالے سے ابھی تک کوئی باضابطہ اعلان نہیں کیا۔