کراچی:امریکہ و ایران کے مابین امن معاہدہ ہوتے ہی عالمی ومقامی مارکیٹوں میں سونے کی قیمتوںمیں ہوشربا اضافہ ریکارڈ کیا گیا ہے۔جس کے بعد فی تولہ سونا 4 لاکھ 55 ہزار روپے کی سطح عبور کر گیا۔

آل پاکستان جیمز اینڈ جیولرز ایسوسی ایشن کے مطابق پیر کے روز مقامی صرافہ بازاروں میں فی تولہ سونے کی قیمت میں 10 ہزار 800 روپے کا بڑا اضافہ ہوا، جس کے بعد فی تولہ سونا 4 لاکھ 55 ہزار 136 روپے کی نئی ریکارڈ سطح پر پہنچ گیا۔

ایسوسی ایشن کے مطابق اسی طرح 10 گرام سونے کی قیمت میں 9 ہزار 720 روپے کا اضافہ ریکارڈ کیا گیا، جس کے بعد 10 گرام سونا 3 لاکھ 89 ہزار 600 روپے کا ہوگیا۔

علاوہ ازاں ملک میں چاندی کی قیمت میں بھی اضافہ دیکھنے میں آیا۔ فی تولہ چاندی 230 روپے مہنگی ہونے کے بعد 7 ہزار 509 روپے کی سطح پر پہنچ گئی۔

دوسری جانب عالمی بلین مارکیٹ میں بھی سونے کی قیمت میں نمایاں اضافہ ریکارڈ کیا گیا۔ عالمی بازار میں سونا 108 ڈالر فی اونس مہنگا ہوکر 4 ہزار 327 ڈالر فی اونس تک پہنچ گیا، جو حالیہ دنوں کی بلند ترین سطح قرار دی جا رہی ہے۔

خیال رہے کہ سونے کی قیمت میں یہ اضافہ ملکی تاریخ میں ایک ہی دن میں سونے کی قیمتوں میں ہونے والے سب سے بڑے اضافوں میں سے ایک ہے۔

یہ اضافہ امریکا اور ایران کے درمیان جنگ کے خاتمے اور امن معاہدے کی خبریں سامنے آنے کے بعد عالمی منڈی میں سونے کی قیمتوں میں دو فیصد سے زائد اضافے کا نتیجہ ہے۔رائٹرز کی رپورٹ کے مطابق عالمی مارکیٹ میں آج اسپاٹ گولڈ کی قیمت ڈھائی فیصد اضافے کے ساتھ 4 ہزار 232 ڈالر 29 سینٹ فی اونس تک پہنچ گئی ہے جو 9 جون کے بعد کی بلند ترین سطح ہے جبکہ امریکی گولڈ فیوچرز بھی ڈھائی فیصد اضافے کے ساتھ 4 ہزار 343 ڈالر 80 سینٹ پر بند ہوئے ہیں۔