ویب ڈیسک: ایک نئی سائنسی تحقیق سے معلوم ہوا ہے کہ زرافے صرف اپنی غیر معمولی جسامت اور لمبی گردن ہی نہیں رکھتے بلکہ وہ مقدار کا اندازہ لگانے اور بنیادی ریاضیاتی صلاحیت کا بھی مظاہرہ کرتے ہیں۔

غیر ملکی میڈیا رپورٹس کے مطابق اسپین میں کی گئی اس تحقیق میں مختلف چڑیا گھروں میں موجود زرافوں کی ذہنی صلاحیتوں کا جائزہ لیا گیا۔ یہ تحقیق یونیورسٹی آف بارسلونا، یونیورسٹی آف لیپزگ اور میکس پلانک انسٹی ٹیوٹ فار ایوولوشنری اینتھروپولوجی کے ماہرین نے مشترکہ طور پر انجام دی۔

تحقیق کے دوران بارسلونا چڑیا گھر میں موجود چار زرافوں کو دو الگ برتنوں میں مختلف مقدار میں گاجروں کے ٹکڑے دکھائے گئے، جنہیں بعد میں ڈھانپ دیا گیا۔ تجربے کے دوران زرافے اس عمل کا مشاہدہ کرتے رہے کہ کسی برتن میں مزید گاجریں ڈالی جا رہی ہیں یا ان میں سے کچھ نکالی جا رہی ہیں۔

بعد ازاں جب زرافوں کو انتخاب کا موقع دیا گیا تو انہوں نے تقریباً 68 فیصد مواقع پر زیادہ گاجروں والے برتن کا انتخاب کیا۔ محققین کے مطابق یہ نتیجہ محض اتفاق نہیں بلکہ اس بات کا ثبوت ہے کہ زرافے مقدار میں فرق کو سمجھنے اور اسی بنیاد پر فیصلہ کرنے کی صلاحیت رکھتے ہیں۔

مزید تجربات میں یہ جانچا گیا کہ آیا زرافے انسانوں کے اشاروں سے متاثر ہو کر انتخاب کرتے ہیں۔ نتائج سے معلوم ہوا کہ چار میں سے دو زرافے ممکنہ طور پر انسانی حرکات سے متاثر ہوئے، جبکہ باقی دو نے مسلسل زیادہ گاجروں والے برتن کا درست انتخاب کیا، جس سے ان کی بہتر ادراکی صلاحیت کا عندیہ ملتا ہے۔

تحقیق میں یہ بھی سامنے آیا کہ جب دونوں برتنوں میں گاجروں کی تعداد کم کر دی گئی تو زرافوں کی درست انتخاب کرنے کی شرح نمایاں طور پر کم ہوگئی اور ان کے فیصلے زیادہ تر اتفاقی ثابت ہوئے۔

سائنسدانوں کا کہنا ہے کہ اگرچہ زرافے انسانوں کی طرح ریاضی نہیں کرتے، تاہم ان میں مقدار اور اعداد کے بنیادی تصور کو سمجھنے کی صلاحیت موجود ہے، جو خوراک کے انتخاب اور دیگر روزمرہ فیصلوں میں مددگار ثابت ہو سکتی ہے۔