تل ابیب: اسرائیلی خفیہ ایجنسی موساد کے سابق سربراہ یوسی کوہن نے دعویٰ کیا ہے کہ صیہونی اہلکار ایران کی زیرِ زمین فردو جوہری تنصیب کا کئی مرتبہ دورہ کر چکے ہیں۔ غیر ملکی میڈیا رپورٹس کے مطابق یوسی کوہن نے کہا کہ موساد نے فردو تنصیب کے بارے میں معلومات حاصل کرنے اور اسے بہتر طور پر سمجھنے کے لیے متعدد مرتبہ وہاں کا دورہ کیا، تاہم انہوں نے ان دوروں کے وقت اور ان میں شریک اہلکاروں سے متعلق تفصیلات ظاہر نہیں کیں۔

صیہونی میڈیا کے مطابق یوسی کوہن نے 2025 میں ایران کے خلاف امریکی فوجی کارروائی کے دوران فردو جوہری تنصیب پر کیے گئے حملے کا بھی خیر مقدم کیا۔ ان کا کہنا تھا کہ امریکی طیاروں کی جانب سے فردو پر بمباری ان کے تمام خوابوں کی تکمیل کے مترادف تھی۔

رپورٹس کے مطابق فردو کے علاوہ ایران کی نطنز اور اصفہان جوہری تنصیبات بھی جون 2025 میں ایران اور اسرائیل کے درمیان ہونے والی 12 روزہ جنگ کے دوران امریکی حملوں کا نشانہ بنی تھیں۔ ان حملوں کے نتیجے میں تینوں جوہری تنصیبات کو شدید نقصان پہنچنے کی اطلاعات سامنے آئی تھیں۔

ایران کی جانب سے 60 فیصد تک افزودہ یورینیم کے ذخیرے کے حوالے سے یوسی کوہن نے کہا کہ یہ مواد اب بھی ایٹمی بم بنانے سے بہت دور ہے۔ تاہم جوہری ماہرین کے مطابق 60 فیصد افزودگی ہتھیار سازی کے لیے درکار سطح کے کافی قریب ہے اور اسے مزید افزودہ کرکے جوہری ہتھیار میں استعمال ہونے والے مواد میں تبدیل کیا جاسکتا ہے۔

یوسی کوہن 2015 سے 2021 تک موساد کے سربراہ رہے۔ عہدے سے سبکدوش ہونے کے بعد انہوں نے ایک غیر معمولی ٹی وی انٹرویو میں ایران کے جوہری پروگرام کے خلاف موساد کی کارروائیوں سے متعلق کئی اہم اشارے دیے تھے۔

میٹا سمری:
سلگ: