ویب ڈیسک: حالیہ سائنسی تحقیق میں انکشاف ہوا ہے کہ فلٹر کافی پینے کی عادت جسمانی اور حیاتیاتی عمر بڑھنے کے عمل کو سست کرنے میں مددگار ثابت ہو سکتی ہے، جبکہ انسٹنٹ کافی استعمال کرنے والوں میں حیاتیاتی عمر نسبتاً تیزی سے بڑھنے کے شواہد سامنے آئے ہیں۔

غیر ملکی میڈیا رپورٹس کے مطابق معروف طبی جریدے این پی جے سائنس آف فوڈ میں شائع ہونے والی تحقیق میں اوسطاً 56 سال عمر رکھنے والے 49 ہزار 414 بالغ افراد کے صحت سے متعلق ڈیٹا اور ڈی این اے میں ہونے والی تبدیلیوں کا تفصیلی جائزہ لیا گیا۔

تحقیق کے نتائج سے معلوم ہوا کہ کافی کے استعمال کی مقدار جتنی زیادہ تھی، اس کے اثرات بھی اتنے ہی نمایاں تھے۔ روزانہ تین یا اس سے زیادہ کپ فلٹر کافی پینے والے افراد میں حیاتیاتی عمر بڑھنے کا عمل دیگر افراد کے مقابلے میں زیادہ سست دیکھا گیا۔

ماہرین کے مطابق انسٹنٹ کافی اور حیاتیاتی عمر میں نسبتاً تیز اضافے کے درمیان تعلق خاص طور پر زیادہ عمر کے افراد، مردوں اور سگریٹ نوشی کرنے والوں میں نمایاں رہا۔

سائنسدانوں نے بتایا کہ فلٹر کافی میں کلوروجینک ایسڈ سمیت کئی مفید قدرتی مرکبات زیادہ مقدار میں موجود ہوتے ہیں، جو جسم میں سوزش کم کرنے، خلیاتی صحت برقرار رکھنے اور میٹابولزم کو بہتر بنانے میں معاون ثابت ہو سکتے ہیں۔

محققین نے یہ بھی واضح کیا کہ انسٹنٹ کافی کے استعمال سے حیاتیاتی عمر میں ہونے والا اضافہ انتہائی معمولی نوعیت کا ہے اور انفرادی سطح پر اس کے اثرات زیادہ نمایاں نہیں ہوتے۔ تاہم عوامی صحت کے تناظر میں یہ نتائج اہمیت رکھتے ہیں اور مزید تحقیق کی ضرورت کو اجاگر کرتے ہیں۔

ماہرین نے اس بات پر بھی زور دیا کہ صحت مند طرز زندگی، متوازن غذا، مناسب ورزش اور تمباکو نوشی سے پرہیز اب بھی عمر بڑھنے کے عمل کو سست رکھنے کے بنیادی عوامل ہیں، جبکہ کافی کے اثرات کو انہی مجموعی عوامل کے تناظر میں دیکھا جانا چاہیے۔