اسلام آباد: پاکستان ٹیلی کمیونیکیشن اتھارٹی نے صارفین کو خبردار کیا ہے کہ غیر فعال، منسوخ یا زیر استعمال نہ رہنے والے موبائل نمبرز سے منسلک واٹس ایپ اکاؤنٹس کسی بھی وقت بند کیے جا سکتے ہیں۔

پی ٹی اے کے مطابق غیر فعال موبائل نمبرز پر قائم واٹس ایپ اکاؤنٹس کو فراڈ، دھوکا دہی اور دیگر غیر قانونی سرگرمیوں کے لیے استعمال کیے جانے کا خدشہ رہتا ہے، جس کے باعث ایسے اکاؤنٹس کے خلاف کارروائی کا فیصلہ کیا گیا ہے۔

اتھارٹی نے صارفین کو ہدایت کی ہے کہ وہ اپنے واٹس ایپ اکاؤنٹ کو ایسے موبائل نمبر سے منسلک رکھیں جو فعال ہو اور مستقل طور پر ان کے زیر استعمال ہو۔ پی ٹی اے کا کہنا ہے کہ منسوخ یا غیر فعال ہونے والے موبائل نمبرز مستقبل میں کسی دوسرے صارف کو جاری کیے جا سکتے ہیں، جس کے نتیجے میں سابق صارف کے اکاؤنٹ اور ذاتی معلومات کے غلط استعمال کا خطرہ پیدا ہوسکتا ہے۔

پی ٹی اے نے ایسے صارفین کو مشورہ دیا ہے جن کے موبائل نمبرز بند یا غیر فعال ہوچکے ہیں کہ وہ واٹس ایپ میں موجود نمبر تبدیل کرنے کی سہولت استعمال کرتے ہوئے اپنا اکاؤنٹ فوری طور پر نئے اور فعال موبائل نمبر پر منتقل کریں۔

اتھارٹی کے مطابق اس اقدام کا بنیادی مقصد صارفین کی ڈیجیٹل سیکیورٹی بہتر بنانا، ذاتی معلومات کا تحفظ یقینی بنانا اور سائبر فراڈ سمیت دیگر غیر قانونی سرگرمیوں کی روک تھام ہے۔ پی ٹی اے نے صارفین پر زور دیا ہے کہ وہ اپنے موبائل نمبرز کی موجودہ حیثیت جانچیں اور اگر نمبر غیر فعال ہوچکا ہے تو واٹس ایپ اکاؤنٹ کو کسی فعال نمبر سے منسلک کرلیں۔سا