نیویارک: فیفا ورلڈ کپ 2026 کے گروپ ای کے اہم مقابلے میں ایکواڈور نے شاندار کم بیک کرتے ہوئے چار مرتبہ کی عالمی چیمپئن جرمنی کو 2-1 سے شکست دے کر ناک آؤٹ مرحلے کے لیے کوالیفائی کر لیا۔

تفصیلات کے مطابق جرمنی نے میچ کے صرف دوسرے منٹ میں لیروئے سانے کے گول کی بدولت برتری حاصل کر لی، تاہم ایکواڈور نے ہمت نہ ہاری اور نویں منٹ میں نیلسن انگولو نے گول کرکے مقابلہ ایک، ایک سے برابر کر دیا۔

دونوں ٹیموں کے درمیان سنسنی خیز مقابلہ جاری رہا، لیکن 77ویں منٹ میں گونزالو پلاٹا نے فیصلہ کن گول اسکور کرکے ایکواڈور کو 2-1 کی برتری دلا دی، جو میچ کے اختتام تک برقرار رہی۔

Ecuador Vs Germany LIVE Score FIFA World Cup 2026

اگرچہ جرمنی پہلے ہی اپنے ابتدائی دو میچ جیت کر گروپ ای میں ٹاپ پوزیشن کے ساتھ ناک آؤٹ مرحلے میں جگہ بنا چکا تھا، تاہم اس شکست کے باوجود وہ گروپ فاتح کی حیثیت سے اگلے مرحلے میں پہنچ گیا، جبکہ ایکواڈور نے اہم فتح کے ساتھ ناک آؤٹ مرحلے کے لیے کوالیفائی کر لیا۔

دوسری جانب اس کامیابی کے بعد ایکواڈور نے ورلڈ کپ کی تاریخ میں دوسری مرتبہ ناک آؤٹ مرحلے میں رسائی حاصل کی، جبکہ جرمنی کی مسلسل 11 فتوحات کا سلسلہ بھی اختتام پذیر ہوگیا۔