دنیا میں پہلی مرتبہ ایبولا وائرس کی بنڈی بگیو قسم کے خلاف تیار کی گئی ایک نئی تجرباتی ویکسین کا انسانی آزمائشی مرحلہ شروع کر دیا گیا ہے، جسے اس بیماری سے نمٹنے کی عالمی کوششوں میں اہم پیش رفت قرار دیا جا رہا ہے۔

بین الاقوامی ذرائع ابلاغ کے مطابق برطانیہ کے 37 سالہ رضاکار ایڈ ہنٹ کو اس ویکسین کی پہلی خوراک دی جا چکی ہے۔ آکسفورڈ یونیورسٹی کے ماہرین نے یہ ویکسین صرف آٹھ ہفتوں میں تیار کی، جبکہ اس کی تیاری میں وہی جدید ٹیکنالوجی استعمال کی گئی ہے جس کی مدد سے آکسفورڈ-ایسٹرازینیکا کی کووڈ-19 ویکسین بنائی گئی تھی۔

ابتدائی مرحلے کے کلینیکل ٹرائل میں 18 سے 55 سال کی عمر کے 50 صحت مند افراد کو شامل کیا جا رہا ہے۔ اس تحقیق کا مقصد ویکسین کی حفاظت، ممکنہ مضر اثرات اور انسانی جسم میں پیدا ہونے والے مدافعتی ردعمل کا جائزہ لینا ہے تاکہ آئندہ مراحل کے لیے اس کی افادیت کا اندازہ لگایا جا سکے۔

پہلے رضاکار ایڈ ہنٹ نے بتایا کہ جمہوریہ کانگو میں ایبولا کی تباہ کن وبا سے متعلق تصاویر اور رپورٹس دیکھنے کے بعد انہوں نے انسانیت کی خدمت کے جذبے کے تحت اس تحقیق کا حصہ بننے کا فیصلہ کیا۔ ان کے مطابق اگر ان کی شرکت سے مستقبل میں قیمتی جانیں بچائی جا سکیں تو یہ ان کے لیے باعثِ اطمینان ہوگا۔

آکسفورڈ یونیورسٹی کی ویکسین تحقیقاتی ٹیم کی سربراہ پروفیسر ٹریسا لیمب نے کہا کہ کئی دہائیوں پر محیط سائنسی تحقیق اور جدید پلیٹ فارم ٹیکنالوجی کی بدولت ان کی ٹیم مختصر ترین مدت میں یہ ویکسین تیار کرنے میں کامیاب ہوئی۔ انہوں نے واضح کیا کہ آزمائشی مرحلے کے دوران کسی بھی رضاکار کو ایبولا وائرس نہیں لگایا جائے گا، بلکہ صرف یہ جانچا جائے گا کہ ویکسین محفوظ ہے یا نہیں اور آیا یہ بنڈی بگیو قسم کے وائرس کے خلاف مؤثر مدافعت پیدا کرتی ہے۔

ماہرین کے مطابق اس وقت بنڈی بگیو قسم کے ایبولا وائرس کے خلاف چار مختلف ویکسینز تحقیق کے مرحلے میں ہیں، تاہم انسانوں پر آزمائش کے مرحلے تک پہنچنے والی یہ دنیا کی پہلی ویکسین ہے۔ آکسفورڈ یونیورسٹی کی تحقیقاتی ٹیم نے یہ بھی بتایا ہے کہ جلد یوگنڈا میں بھی اس ویکسین کے ابتدائی انسانی ٹرائلز کا آغاز کیا جائے گا، جس سے اس تحقیق کو مزید وسعت ملے گی۔