اسلام آباد: ڈیجیٹل پاکستان کے وژن کے تحت حج رجسٹریشن کے نظام میں نمایاں پیش رفت سامنے آئی ہے۔ وزارت مذہبی امور کے مطابق صرف 14 روز کے دوران 2 لاکھ 32 ہزار سے زائد افراد نے 2027 سے 2030 تک کے حج کے لیے آن لائن رجسٹریشن مکمل کر لی ہے۔

وزارت کے مطابق حج رجسٹریشن کا عمل تاحال جاری ہے اور خواہشمند عازمین گھر بیٹھے پاک حج ایپ اور آن لائن پورٹل کے ذریعے چند ہی منٹوں میں اپنی رجسٹریشن کروا رہے ہیں۔

حکام کا کہنا ہے کہ نیشنل آئی ٹی بورڈ کی تیار کردہ پاک حج ایپ اور آن لائن پورٹل نے رجسٹریشن کے عمل کو پہلے سے کہیں زیادہ آسان، تیز اور شفاف بنا دیا ہے۔

اعداد و شمار کے مطابق ایک لاکھ 75 ہزار سے زائد افراد نے سرکاری حج اسکیم، جبکہ 58 ہزار سے زائد عازمین نے نجی حج اسکیم کے تحت رجسٹریشن کرائی ہے۔

صوبائی تفصیلات کے مطابق پنجاب سے ایک لاکھ 8 ہزار، سندھ سے 71 ہزار، خیبرپختونخوا سے 33 ہزار افراد نے رجسٹریشن مکمل کی، جبکہ مجموعی طور پر رجسٹرڈ عازمین میں ایک لاکھ 36 ہزار مرد اور 96 ہزار خواتین شامل ہیں۔

وزارت مذہبی امور نے واضح کیا ہے کہ نئی ہدایات جاری ہونے تک 2027 سے 2030 تک کے حج کے لیے آن لائن رجسٹریشن بلا تعطل جاری رہے گی۔ وزارت نے تمام خواہشمند عازمین کو ہدایت کی ہے کہ ممکنہ رش سے بچنے کے لیے جلد از جلد اپنی رجسٹریشن مکمل کر لیں۔