ویب ڈیسک: ایک نئی طبی تحقیق میں انکشاف ہوا ہے کہ روزانہ مناسب وقت تک قدرتی دھوپ میں رہنے سے ڈیمنشیا (یادداشت کی کمزوری) کا خطرہ 25 فیصد تک کم ہو سکتا ہے۔

چین کی مختلف جامعات کے محققین نے تقریباً 87 ہزار 600 افراد پر آٹھ سال تک تحقیق کی۔ شرکا کی اوسط عمر 62 سال تھی اور ان کی روزمرہ سرگرمیوں اور سورج کی روشنی میں گزارے گئے وقت کا ریکارڈ خصوصی ایکٹی گرافی ڈیوائسز کے ذریعے جمع کیا گیا۔

تحقیق کے دوران 741 افراد میں ڈیمنشیا کی تشخیص ہوئی۔ نتائج سے معلوم ہوا کہ جو افراد زیادہ تر وقت مدھم روشنی یا گھر کے اندر گزارتے تھے، ان میں ڈیمنشیا کا خطرہ نسبتاً زیادہ تھا، جبکہ زیادہ روشن ماحول یا قدرتی روشنی میں وقت گزارنے والوں میں اس خطرے میں 15 سے 25 فیصد تک کمی دیکھی گئی۔

تحقیق کے مطابق دن کے وقت اوسطاً ایک ہزار لکس یا اس سے زیادہ روشنی میں رہنے سے ڈیمنشیا کے خطرے میں 16 فیصد کمی دیکھی گئی، جبکہ روزانہ تقریباً ڈیڑھ گھنٹہ تین ہزار لکس یا اس سے زیادہ قدرتی روشنی میں گزارنے سے یہ خطرہ 18 فیصد تک کم ہو گیا۔

اسی طرح روزانہ 40 سے 45 منٹ انتہائی تیز قدرتی روشنی، یعنی تقریباً سات ہزار لکس یا اس سے زیادہ شدت والی روشنی میں رہنے سے بھی ڈیمنشیا کے خطرے میں 17 فیصد تک کمی دیکھی گئی۔

محققین کے مطابق روزانہ تقریباً 42 منٹ سے کم تیز قدرتی روشنی میں رہنا ڈیمنشیا کے خطرے کا ایک اہم سبب ثابت ہوا، جو موٹاپے، الکحل کے استعمال اور دماغی چوٹ جیسے کئی معروف خطرے کے عوامل سے بھی زیادہ مؤثر پایا گیا۔

تحقیق میں یہ بھی سامنے آیا کہ اگرچہ رات کے وقت زیادہ روشنی نیند کو متاثر کر سکتی ہے، تاہم دن کے وقت مناسب مقدار میں سورج کی روشنی حاصل کرنے سے اس منفی اثر کو کافی حد تک کم کیا جا سکتا ہے۔ ایسے افراد میں ڈیمنشیا کا خطرہ 30 سے 38 فیصد تک کم دیکھا گیا، جبکہ دیر رات تک جاگنے والے افراد اگر دن میں زیادہ دھوپ حاصل کریں تو ان میں یہ خطرہ 40 فیصد تک کم ہو سکتا ہے۔

یہ تحقیق طبی جریدے General Psychiatry میں شائع ہوئی ہے۔