ویب ڈیسک:جاپان میں ہونے والی ایک نئی تحقیق سے معلوم ہوا ہے کہ فلمیں دیکھنے، میوزیم اور آرٹ گیلریوں کی سیر کرنے، یا کنسرٹ اور تھیٹر جیسی ثقافتی سرگرمیوں میں حصہ لینے سے جسم کے قدرتی طور پر بوڑھا ہونے کے عمل کی رفتار سست پڑ سکتی ہے۔

جاپان کے انسٹیٹیوٹ آف سائنس کی اس تحقیق میں تقریباً 1,900 افراد کے طبی اور طرزِ زندگی سے متعلق ڈیٹا کا تجزیہ کیا گیا۔ محققین نے شرکاء سے سوالناموں کے ذریعے معلوم کیا کہ وہ کتنی بار فلمیں دیکھنے جاتے ہیں، میوزیم یا آرٹ گیلری کا رخ کرتے ہیں یا موسیقی اور تھیٹر کی تقریبات میں شرکت کرتے ہیں۔

اس کے بعد شرکاء کی صحت سے متعلق مختلف اشاریوں، جن میں نبض کا دباؤ، بلڈ پریشر، کولیسٹرول کی سطح، جسمانی وزن اور چہل قدمی کی رفتار شامل تھی، کا تفصیلی جائزہ لیا گیا۔

تحقیق کے نتائج سے پتا چلا کہ جو افراد باقاعدگی سے ثقافتی سرگرمیوں میں حصہ لیتے ہیں، ان میں جسمانی عمر بڑھنے کی رفتار نسبتاً کم دیکھی گئی۔ محققین کے مطابق ہر چند ماہ بعد بھی ایسی کسی سرگرمی میں شرکت صحت پر مثبت اثرات مرتب کر سکتی ہے۔

تحقیق میں آمدنی، دائمی بیماریوں اور دیگر ممکنہ عوامل کو بھی مدنظر رکھا گیا، تاہم ان کے اثرات الگ کرنے کے بعد بھی یہی رجحان سامنے آیا کہ ثقافتی سرگرمیوں سے وابستہ افراد میں جسمانی تنزلی کی رفتار نسبتاً سست رہتی ہے۔

محققین کا کہنا ہے کہ اگرچہ جسم کے بوڑھا ہونے پر کئی عوامل اثر انداز ہوتے ہیں، تاہم بعض مثبت عادات اس قدرتی عمل کی رفتار کم کرنے میں مددگار ثابت ہو سکتی ہیں۔ ان کے مطابق ثقافتی سرگرمیاں نہ صرف ذہنی آسودگی کا باعث بنتی ہیں بلکہ مجموعی صحت پر بھی مثبت اثر ڈالتی ہیں اور جسمانی تنزلی کو قابو میں رکھنے میں معاون ثابت ہو سکتی ہیں۔

انہوں نے مزید کہا کہ اس موضوع پر مزید تحقیق کی ضرورت ہے تاکہ یہ معلوم کیا جا سکے کہ کون سی ثقافتی سرگرمیاں صحت اور بڑھاپے کی رفتار پر سب سے زیادہ مثبت اثرات مرتب کرتی ہیں۔