ویب ڈیسک: اٹلی کے شہر ٹورین کے کیسلے ائیرپورٹ پر حکام نے ایک اطالوی شہری کے سامان سے معدومی کے خطرے سے دوچار مگرمچھ کا سر برآمد کرکے تحقیقات شروع کردی ہیں۔

ٹورین میں اطالوی مالیاتی پولیس کے اسکواڈ نے بتایا کہ مذکورہ شخص میامی سے استنبول کے راستے اٹلی پہنچا تھا۔ حکام معدومی کے خطرے سے دوچار جانوروں کی غیر قانونی تجارت کی روک تھام کے لیے مسافروں کی اضافی جانچ کررہے تھے، اسی دوران مذکورہ مسافر کے سامان کی تلاشی لی گئی۔

تلاشی کے دوران سامان سے مگرمچھ کا سر برآمد ہوا، جسے خشک کیا گیا تھا اور عام پیکنگ پیپر میں لپیٹ کر رکھا گیا تھا۔ حکام کے مطابق اسی انداز میں پیک کیے جانے کے باعث یہ سامان روانگی کے مقام پر سیکیورٹی جانچ سے بچنے میں کامیاب ہوگیا۔

اطالوی حکام نے مگرمچھ کا سر قبضے میں لے لیا اور مسافر کے خلاف محفوظ اور معدومی کے خطرے سے دوچار جانور کے سر کو ضروری اجازت نامے کے بغیر منتقل کرنے کے الزام میں تحقیقات شروع کردی ہیں۔

حکام کے مطابق جرم ثابت ہونے کی صورت میں مذکورہ شخص کو 20 ہزار سے 2 لاکھ یورو تک جرمانہ یا چھ ماہ سے ایک سال تک قید کی سزا ہوسکتی ہے۔

مگرمچھ ان جانوروں میں شامل ہے جنہیں واشنگٹن کنونشن کے تحت تحفظ حاصل ہے۔ 1973 میں طے پانے والے اس عالمی معاہدے کا مقصد معدومی کے خطرے سے دوچار جانوروں اور پودوں کی غیر قانونی تجارت کی روک تھام ہے۔