فلاڈیلفیا: کروشیا نے سنسنی خیز مقابلے کے بعد گھانا کو 2-1 سے شکست دے کر فیفا ورلڈ کپ 2026 کے ناک آؤٹ مرحلے کے لیے کوالیفائی کر لیا، جبکہ گھانا بھی بہترین تیسرے نمبر پر رہنے والی ٹیموں میں شامل ہو کر آخری 32 مرحلے میں پہنچ گیا۔

گروپ ایل کے میچ میں کروشیا نے آغاز ہی سے جارحانہ کھیل پیش کیا اور 34ویں منٹ میں پیٹر سوچیچ نے میٹیو کووچیچ کے شاندار پاس پر گول کرکے اپنی ٹیم کو برتری دلائی، جو پہلے ہاف کا واحد گول ثابت ہوا۔

دوسرے ہاف میں گھانا نے بھرپور انداز میں واپسی کی اور 73ویں منٹ میں ڈیرک لکاسن نے ارنسٹ نواماہ کے کراس پر ہیڈر کے ذریعے گیند جال میں پہنچا دی۔ ویڈیو اسسٹنٹ ریفری (VAR) کی تقریباً چار منٹ تک جانچ کے بعد گول کو درست قرار دیا گیا۔

میچ میں برابری کے بعد گھانا نے دباؤ بڑھایا، تاہم 83ویں منٹ میں کپتان لوکا موڈریچ کے عمدہ کراس پر نکولا ولاشیچ نے شاندار ہیڈر کے ذریعے فیصلہ کن گول اسکور کر کے کروشیا کو قیمتی فتح دلا دی۔

اس کامیابی کے ساتھ کروشیا گروپ ایل میں انگلینڈ کے بعد دوسری پوزیشن حاصل کرتے ہوئے ناک آؤٹ مرحلے میں پہنچ گیا۔ دوسری جانب انگلینڈ نے پاناما کو شکست دے کر گروپ میں پہلی پوزیشن برقرار رکھی۔

اگرچہ گھانا کو شکست کا سامنا کرنا پڑا، تاہم وہ بہترین تیسرے نمبر پر رہنے والی ٹیموں میں شامل ہونے کے باعث آخری 32 مرحلے کے لیے کوالیفائی کرنے میں کامیاب رہا، جبکہ اس نتیجے کے بعد اسکاٹ لینڈ کا ٹورنامنٹ میں سفر اختتام پذیر ہوگیا۔