بوگاٹا: کولمبیا کی نئی حکومت نے گولان کی پہاڑیوں پر صیہونی ریاست کی خودمختاری کو تسلیم کرنے کا اعلان کردیا ہے، جسے دونوں فریقوں کے درمیان تعلقات میں مزید قربت کی علامت قرار دیا جا رہا ہے۔

غیر ملکی ذرائع ابلاغ کے مطابق کولمبیا کی وزارت خارجہ نے جاری بیان میں کہا ہے کہ مشرق وسطیٰ میں مسلسل علاقائی عدم استحکام اور گولان کی پہاڑیوں کی صیہونی ریاست کی سلامتی کے حوالے سے تزویراتی اہمیت کو مدنظر رکھتے ہوئے حکومت نے اس علاقے پر صیہونی خودمختاری تسلیم کرنے کا فیصلہ کیا۔

بیان کے مطابق کولمبیا صیہونی ریاست کے بیرونی خطرات کے خلاف اپنے دفاع کے حق کو بھی تسلیم کرتا ہے۔ کولمبیا کی حکومت کا کہنا ہے کہ موجودہ علاقائی سلامتی کی صورتحال میں گولان کی پہاڑیوں پر صیہونی ریاست کا کنٹرول اور خودمختاری اس کے قومی دفاع اور شہریوں کے تحفظ کی صلاحیت کا اہم حصہ ہے۔

کولمبیا کی نئی حکومت کا یہ فیصلہ ایسے وقت میں سامنے آیا ہے جب ملک کے صیہونی ریاست کے ساتھ تعلقات میں مزید پیش رفت دیکھی جا رہی ہے۔ کولمبیا اس سے قبل اپنا سفارتخانہ یروشلم منتقل کرنے کا فیصلہ بھی کرچکا ہے۔

گولان کی پہاڑیاں شام کا تزویراتی اہمیت رکھنے والا علاقہ ہیں، جن پر صیہونی ریاست نے 1967 کی چھ روزہ جنگ کے دوران قبضہ کیا تھا۔ بعد ازاں 1981 میں صیہونی ریاست نے وہاں اپنا قانون، انتظامیہ اور دائرہ اختیار نافذ کردیا، تاہم اس اقدام کو عالمی سطح پر بڑے پیمانے پر الحاق کے مترادف سمجھا گیا۔