طبی ماہرین نے انکشاف کیا ہے کہ بائی پولر ڈس آرڈر اور شدید ڈپریشن کے علاج کے لیے کئی برسوں سے استعمال ہونے والی کم قیمت دوا لیتھیم مستقبل میں الزائمر کے مرض کے علاج میں بھی اہم کردار ادا کر سکتی ہے۔ تازہ سائنسی شواہد سے معلوم ہوا ہے کہ اس دوا کی کم مقدار دماغی خلیات کو تحفظ فراہم کرنے اور یادداشت کی صلاحیت بہتر بنانے میں مددگار ثابت ہو سکتی ہے، تاہم ماہرین نے اس حوالے سے مزید وسیع پیمانے پر تحقیق کی ضرورت پر زور دیا ہے۔

معروف طبی جریدے نیچر میں شائع ہونے والی سابقہ تحقیق میں بتایا گیا تھا کہ الزائمر کے مریضوں کے دماغ میں لیتھیم کی مقدار صحت مند افراد کے مقابلے میں کم ہوتی ہے۔ اسی بنیاد پر سائنس دانوں نے مزید تجربات کیے تاکہ معلوم کیا جا سکے کہ آیا اس کمی کو پورا کرنے سے بیماری کی شدت میں کمی لائی جا سکتی ہے۔

تحقیق کے دوران الزائمر سے متاثرہ چوہوں کو لیتھیم کی نہایت کم مقدار دی گئی۔ نتائج سے ظاہر ہوا کہ ان کی یادداشت کی کارکردگی میں نمایاں بہتری آئی جبکہ دماغی خلیات کو پہنچنے والے نقصان کے اثرات بھی کم ہوئے۔ محققین کے مطابق لیتھیم دماغ کے ان خلیات کو محفوظ رکھنے میں مدد دیتی ہے جو یادداشت، سیکھنے اور سوچنے کی صلاحیت سے وابستہ ہوتے ہیں۔ اس کے ساتھ ساتھ یہ دماغ کے مختلف حصوں کے درمیان اعصابی رابطوں کو برقرار رکھنے میں بھی معاون ثابت ہو سکتی ہے۔

طبی جریدے ٹرانسلیشنل سائیکیاٹری میں شائع ہونے والے ایک نئے مقالے میں ماہرین نے تجویز دی ہے کہ الزائمر کے ابتدائی مرحلے میں مبتلا مریضوں پر کم مقدار میں لیتھیم کے استعمال کے حوالے سے مزید تفصیلی اور بڑے پیمانے پر طبی آزمائشیں کی جائیں تاکہ اس کے حقیقی فوائد اور ممکنہ خطرات کا درست اندازہ لگایا جا سکے۔

دوسری جانب الزائمر سوسائٹی کے تحقیقاتی ڈائریکٹر ڈاکٹر رچرڈ اوکلے نے اس تحقیق پر محتاط ردعمل دیتے ہوئے کہا کہ اگرچہ یہ نتائج حوصلہ افزا ہیں اور الزائمر کے علاج سے متعلق نئی امید پیدا کرتے ہیں، لیکن فی الحال ایسا کوئی مضبوط ثبوت موجود نہیں کہ لیتھیم ڈیمینشیا یا الزائمر سے مکمل تحفظ فراہم کر سکتی ہے یا اس کا یقینی علاج ثابت ہو سکتی ہے۔

انہوں نے واضح کیا کہ اب تک انسانوں پر ہونے والی طبی آزمائشیں محدود ہیں، اس لیے اس دوا کو الزائمر کے علاج کا باقاعدہ حصہ بنانے سے قبل مزید جامع اور طویل المدتی تحقیقات ناگزیر ہیں۔