لندن: برطانیہ کے وزیراعظم کیئر اسٹارمر نے اپنی جماعت کے اندرونی دباؤ کے بعد عہدے سے مستعفی ہونے کا اعلان کر دیا ہے۔

غیر ملکی میڈیا کے مطابق ٹین ڈاؤننگ اسٹریٹ میں پریس بریفنگ کے دوران کیئر اسٹارمر نے کہا کہ انہیں بارہا بتایا گیا کہ لیبر پارٹی کمزور ہو چکی ہے، اس لیے وہ پارٹی کی خواہش کے مطابق قیادت سے دستبردار ہونے کا فیصلہ کر رہے ہیں۔

انہوں نے بتایا کہ آج صبح ان کی کنگ چارلس سے بات چیت ہوئی ہے اور وہ نئے رہنما کے انتخابی عمل کی تکمیل تک وزیراعظم کے فرائض انجام دیتے رہیں گے۔

رپورٹس کے مطابق ان کا کہنا تھا کہ وہ اپنے جانشین کے ساتھ مکمل تعاون کریں گے اور اقتدار کی منظم اور ہموار منتقلی کے لیے ہر ممکن کردار ادا کریں گے۔

کیئر اسٹارمر 2024 کے عام انتخابات میں تاریخی کامیابی کے بعد وزیراعظم بنے تھے۔ ان کی قیادت میں لیبر پارٹی نے 14 برس سے اقتدار میں موجود کنزرویٹو پارٹی کو شکست دے کر حکومت قائم کی تھی۔

سیاسی مبصرین کے مطابق گزشتہ ایک دہائی کے دوران یہ چھٹی مرتبہ ہے کہ برطانیہ کے کسی وزیراعظم نے عہدہ چھوڑنے کا اعلان کیا ہے۔

مزید یہ کہ گزشتہ چار برسوں میں تیسری بار ایسا ہوا ہے کہ کسی برطانوی وزیراعظم نے عام انتخابات میں شکست کے بجائے اپنی ہی جماعت کے دباؤ کے باعث اقتدار چھوڑنے کا فیصلہ کیا ہو۔