ایران:ایران کی وزارت خارجہ نے دعویٰ کیا ہے کہ برطانیہ، بلغاریہ اور یوکرین نے ایران کے خلاف کسی بھی جنگ میں شامل نہ ہونے کی یقین دہانی کرائی ہے۔

غیر ملکی ذرائع ابلاغ کے مطابق ایرانی وزارت خارجہ کے ترجمان اسماعیل بقائی نے ایک انٹرویو میں کہا کہ امریکا نے مفاہمتی یادداشت (ایم او یو) کے تحت بحری آمدورفت کی بحالی کی اجازت نہیں دی۔ ان کے بقول امریکا نے معاہدے کی مدت ختم ہونے سے پہلے حملہ کیا، جس کے باعث آبنائے ہرمز کی بندش کا معاملہ امریکی وعدوں کی خلاف ورزی سے جڑا ہوا ہے۔

اسماعیل بقائی نے مزید بتایا کہ ایران عمان کے ساتھ نئے بحری راستے پر بات چیت کر رہا ہے، تاہم آبنائے ہرمز کو کھولنے کا معاملہ عمان کے ساتھ جاری مذاکرات سے الگ ہے۔

انہوں نے کہا کہ ایران خطے میں بحری آمدورفت اور تجارتی سرگرمیوں کے حوالے سے مختلف سفارتی اقدامات جاری رکھے ہوئے ہے تاکہ موجودہ صورتحال کا پُرامن حل تلاش کیا جا سکے۔

واضح رہے کہ اس سے قبل ایران کے وزیر خارجہ عباس عراقچی نے کہا تھا کہ آبنائے ہرمز کے معاملے پر ایران اور عمان کے درمیان جاری مذاکرات اپنے آخری مراحل میں داخل ہو چکے ہیں، جن سے متعلق جلد اہم پیش رفت سامنے آنے کی توقع ہے۔