لندن: برطانیہ میں غوطہ خوروں نے کئی دہائیاں قبل سمندر میں غرق ہونے والی دوسری جنگ عظیم کے دور کی جرمن آبدوز کا ملبہ تلاش کرلیا۔

غیر ملکی میڈیا رپورٹس کے مطابق آبدوز کا ملبہ برطانوی علاقے ڈیون کے ساحل سے تقریباً 20 میل دور انگلش چینل میں دریافت ہوا۔ آئن ٹیلر اور اسکن ڈیپر ٹیم نے کچھ عرصہ قبل سمندر کی تہہ میں یہ ملبہ تلاش کیا تھا، تاہم اس وقت یہ واضح نہیں تھا کہ یہ کسی آبدوز کا ہے یا پہلی جنگ عظیم کے دور کے کسی جنگی بحری جہاز کا۔

رپورٹس کے مطابق ایک اندازے کے تحت یہ آبدوز تقریباً 82 سال قبل سمندر میں ڈوبی تھی۔ 55 سالہ ڈوم رابنسن اور ان کی ٹیم نے ملبے کی شناخت کے لیے دوبارہ اس مقام کا رخ کیا۔

تاریخ دان ایلس نیسلے سے مشاورت کے بعد ٹیم نے تصدیق کی کہ دریافت ہونے والا ملبہ جرمن آبدوز یو 672 کا ہے، جو دوسری جنگ عظیم کے دوران استعمال کی گئی تھی اور 1944 میں لاپتا ہوگئی تھی۔

ڈوم رابنسن نے بتایا کہ دوسری جنگ عظیم کے دوران اس نوعیت کی آبدوزیں جنگی جہازوں کو نشانہ بنانے اور ڈبونے کے لیے استعمال کی جاتی تھیں۔ ان کے مطابق آبدوز میں عموماً 52 افراد پر مشتمل عملہ موجود ہوتا تھا۔

انہوں نے کہا کہ ٹیم کو توقع نہیں تھی کہ اس مقام پر ایسا ملبہ مل جائے گا اور آبدوز کی دریافت ان کی دوسری کوشش میں ہوئی۔ ڈوم رابنسن کے مطابق یہ ان کے لیے ایک بہت بڑا لمحہ تھا، جبکہ وہ یہ سوچ کر بھی حیران تھے کہ دوسری جنگ عظیم کے زمانے میں ایسے مقام پر موجود ہونا کتنا خوفناک تجربہ رہا ہوگا۔

ڈوم رابنسن اور ان کی ٹیم سمندر میں لاپتا ہونے والے بحری جہازوں اور دیگر تاریخی ملبے کی تلاش کا کام کرتی ہے۔