ویب ڈیسک:ایک نئی طبی تحقیق میں انکشاف ہوا ہے کہ روزانہ پانچ کپ تک بلیک کافی پینا دل کی صحت کے لیے فائدہ مند ثابت ہو سکتا ہے، تاہم ماہرین نے خبردار کیا ہے کہ ضرورت سے زیادہ کیفین کا استعمال صحت کے لیے نقصان دہ بھی ہو سکتا ہے۔

تحقیق کے مطابق بغیر چینی، دودھ یا مصنوعی ذائقوں کے پی جانے والی بلیک کافی میں ایسے قدرتی مرکبات موجود ہوتے ہیں جو دل کی صحت کو بہتر بنانے میں مددگار ثابت ہوتے ہیں۔ محققین نے مشاہدہ کیا کہ بلیک کافی پینے والے افراد میں ٹائپ ٹو ذیابیطس، دل کی بیماری، فالج، ہارٹ فیل اور دل کی بے ترتیب دھڑکن (اریتھمیا) کا خطرہ نسبتاً کم دیکھا گیا۔

ماہرین کا کہنا ہے کہ کافی میں موجود اینٹی آکسیڈنٹس جسم کو نقصان دہ فری ریڈیکلز سے بچانے، خون کی نالیوں کی کارکردگی بہتر بنانے اور جسم میں سوزش کم کرنے میں مدد دیتے ہیں۔ طبی ماہرین کے مطابق سوزش کئی سنگین بیماریوں، بشمول کینسر، کی ابتدائی وجوہات میں شامل سمجھی جاتی ہے۔

تحقیق میں یہ بھی بتایا گیا کہ کافی میں موجود کیفین بھی بعض طبی فوائد فراہم کر سکتی ہے، تاہم اس کے اثرات ہر شخص میں یکساں نہیں ہوتے۔ ماہرین نے خبردار کیا کہ زیادہ مقدار میں کیفین دل کو حد سے زیادہ متحرک کر سکتی ہے، جس کے نتیجے میں بلڈ پریشر بڑھ سکتا ہے، دل کی دھڑکن بے ترتیب ہو سکتی ہے اور بعض صورتوں میں دل کے دورے کا خطرہ بھی پیدا ہو سکتا ہے۔

اس تحقیق کے حوالے سے یونیورسٹی آف کیلیفورنیا کے شعبۂ امراض قلب کے تحقیقی ٹیم کے سربراہ ڈاکٹر گریگوری مارکوس نے کہا کہ کافی میں موجود کیفین دنیا بھر میں لاکھوں افراد کی روزمرہ زندگی کا اہم حصہ ہے اور اس کے اثرات پر مسلسل تحقیق جاری ہے۔

انہوں نے بتایا کہ بعض تحقیقات میں ایک سے تین کپ کافی پینے کے بعد بلڈ پریشر میں اضافے کا مشاہدہ کیا گیا، جو دل کے دورے اور فالج کے خطرے میں اضافہ کر سکتا ہے۔ تاہم روزانہ کافی پینے کا تعلق ایٹریل فبریلیشن کے کم خطرے سے بھی سامنے آیا ہے۔ یہ ایک ایسی کیفیت ہے جس میں دل کی دھڑکن بے ترتیب ہو جاتی ہے، جس سے دل کی تیز دھڑکن، کمزوری، خون کے لوتھڑے بننے اور فالج جیسے مسائل پیدا ہو سکتے ہیں۔

ماہرین نے زور دیا کہ کافی سے ممکنہ فوائد حاصل کرنے کے لیے اعتدال ضروری ہے اور ضرورت سے زیادہ کیفین کے استعمال سے گریز کرنا چاہیے، خصوصاً ایسے افراد کو جو پہلے سے ہائی بلڈ پریشر یا دل کے امراض میں مبتلا ہوں۔