ویب ڈیسک:مشرق وسطیٰ میں ایران اور امریکا کے درمیان بڑھتی ہوئی کشیدگی اور جنگ بندی سے متعلق غیر یقینی صورتحال کے باوجود دنیا کی سب سے بڑی ڈیجیٹل کرنسی بٹ کوائن نے مارکیٹ میں غیر معمولی استحکام کا مظاہرہ کیا ہے۔

مارکیٹ رپورٹس کے مطابق کاروباری ہفتے کے اختتام پر ایک بٹ کوائن کی قیمت تقریباً 60 ہزار ڈالر کے قریب برقرار رہی، جبکہ بیشتر متبادل کرپٹو کرنسیاں معمولی دباؤ کا شکار رہیں۔

ہفتے کے آغاز میں بٹ کوائن کی قیمت میں تیزی دیکھی گئی اور یہ 65 ہزار 500 ڈالر تک پہنچ گیا، تاہم منافع کے حصول کے لیے فروخت میں اضافے کے باعث قیمت کم ہو کر 62 ہزار 400 ڈالر سے بھی نیچے آ گئی۔

بدھ کے روز خطے میں بڑھتی ہوئی جغرافیائی کشیدگی اور سرمایہ کاروں کے خدشات کے باعث بٹ کوائن تقریباً 59 ہزار ڈالر تک گر گیا، جبکہ جمعرات کو معمولی بحالی کے بعد ایک اور فروختی لہر کے نتیجے میں اس کی قیمت 58 ہزار ڈالر تک پہنچ گئی، جو 2024 کے اواخر کے بعد کم ترین سطح قرار دی جا رہی ہے۔

بعد ازاں خریدار دوبارہ متحرک ہوئے، جس کے نتیجے میں بٹ کوائن کی قیمت میں تقریباً دو ہزار ڈالر کا اضافہ ہوا اور گزشتہ 36 گھنٹوں سے یہ تقریباً 60 ہزار ڈالر کے قریب مستحکم رہی۔

اعداد و شمار کے مطابق بٹ کوائن کی مجموعی مارکیٹ ویلیو 1.2 ٹریلین ڈالر سے تجاوز کر چکی ہے، جبکہ عالمی کرپٹو مارکیٹ میں اس کا حصہ بھی بڑھ کر تقریباً 56 فیصد تک پہنچ گیا ہے۔

معاشی تجزیہ کاروں کا کہنا ہے کہ ایران اور امریکا کے درمیان جاری کشیدگی اور جنگ بندی سے متعلق غیر یقینی حالات کے باوجود بٹ کوائن میں شدید اتار چڑھاؤ نہ آنا اس بات کی علامت ہے کہ ڈیجیٹل اثاثوں پر سرمایہ کاروں کا اعتماد بدستور مضبوط ہے۔