لاہور (عبدالسلام علی): ماضی کی نامور اداکارہ اور لیجنڈ بابرہ شریف نے کہا ہے کہ نئے اداکاروں کو پروڈیوسرز کے لیے آسانیاں پیدا کرنی چاہییں تاکہ فلم انڈسٹری کی بحالی ممکن ہو سکے۔

وہ لاہور میں اداکار و پروڈیوسر غلام محی الدین کی فلم “ریڈ لائن” کی افتتاحی تقریب میں بطور مہمانِ خصوصی شریک تھیں۔

تقریب سے خطاب کرتے ہوئے بابرہ شریف نے کہا کہ ماضی میں فلموں کی کامیابی کا راز کام سے سچی لگن اور خلوص تھا۔ ان کے مطابق اس دور کے رائٹرز، پروڈیوسرز اور اداکار سب اپنے کام سے بے حد مخلص ہوتے تھے اور کم معاوضے پر بھی کام کرنے کے لیے تیار رہتے تھے۔

انہوں نے کہا کہ آج کے فنکاروں کو بھی چاہیے کہ وہ پروڈیوسرز کی مجبوریوں کو سمجھیں اور ان کے مطابق کام کریں تاکہ انڈسٹری کو فائدہ پہنچے اور یہ دوبارہ اپنے سنہری دور کی طرف لوٹ سکے۔

بابرہ شریف نے ماضی کو یاد کرتے ہوئے کہا کہ پہلے زمانے میں اداکار کوسٹر میں میک اپ کرتے تھے اور فلم کے سیٹ پر اپنا کھانا خود لاتے تھے۔

انہوں نے یہ بھی کہا کہ اگرچہ انڈسٹری کی بحالی کی کوششیں جاری ہیں، لیکن ابھی مکمل بہتری نہیں آئی، تاہم مسلسل محنت سے سنہرا دور واپس آ سکتا ہے۔

واضح رہے کہ فلم “ریڈ لائن” کے پروڈیوسر اور ڈائریکٹر غلام محی الدین ہیں۔ تقریب میں بابرہ شریف کی طویل عرصے بعد شرکت نے سب کی توجہ حاصل کر لی۔