مظفرآباد: آزاد کشمیر کے ضلع باغ کی دونوں انتخابی نشستوں کے غیر حتمی اور غیر سرکاری نتائج سامنے آگئے، جہاں ایک نشست پر پاکستان پیپلز پارٹی جبکہ دوسری پر مسلم لیگ ن نے کامیابی حاصل کرلی۔

تفصیلات کے مطابق آزاد کشمیر کے انتخابات میں باغ کی 2 نشستوں کے 23 پولنگ اسٹیشنز پر آج دوبارہ پولنگ ہوئی، جس کے بعد غیر حتمی اور غیر سرکاری نتائج جاری کیے گئے ہیں۔

ایل اے 16 باغ کے تمام 186 پولنگ اسٹیشنز کے نتائج کے مطابق مسلم لیگ ن کے امیدوار میر اکبر خان 20 ہزار 793 ووٹ لے کر کامیاب ہوگئے۔ ان کے مد مقابل پاکستان پیپلز پارٹی کے قمر الزمان خان نے 16 ہزار 964 ووٹ حاصل کیے۔

میر اکبر خان نے قمر الزمان خان کو 3 ہزار 829 ووٹوں کے واضح فرق سے شکست دی۔

دوسری جانب ایل اے 15 باغ کے تمام 213 پولنگ اسٹیشنز کے غیر حتمی اور غیر سرکاری نتائج کے مطابق پاکستان پیپلز پارٹی کے امیدوار ضیاء قمر 17 ہزار 19 ووٹ لے کر کامیاب ہوگئے۔

ان کے مقابل مسلم لیگ ن کے امیدوار مشتاق منہاس نے 15 ہزار 127 ووٹ حاصل کیے، یوں ضیاء قمر نے انہیں ایک ہزار 892 ووٹوں کے فرق سے شکست دی۔

ضلع باغ کی دونوں نشستوں کے مجموعی 23 پولنگ اسٹیشنز پر دوبارہ پولنگ صبح 8 بجے شروع ہوئی جو شام 5 بجے تک جاری رہی۔ ان میں بعض پولنگ اسٹیشنز پر انتخابی سامان نہ پہنچنے کے باعث ووٹنگ نہیں ہوسکی تھی، جبکہ کچھ مقامات پر امن و امان کی صورتحال کے باعث بھی پولنگ کا عمل متاثر ہوا تھا۔

دوبارہ پولنگ کے بعد سامنے آنے والے نتائج کے مطابق باغ کی دونوں نشستیں مختلف جماعتوں کے حصے میں آئی ہیں، جہاں ایل اے 15 پر پیپلز پارٹی اور ایل اے 16 پر مسلم لیگ ن نے کامیابی حاصل کی۔