تہران : امریکی و اسرائیلی جارحیت کے دوران شہید ہونے والے ایران کے سپریم لیڈر سید آیت اللہ خامنہ ای کی نماز جنازہ اور تدفین کا اعلان کر دیا گیا ہے۔

ایرانی میڈیا رپورٹس کے مطابق4 اور 5 جولائی کو شہید ایرانی سپریم لیڈر آیت اللہ خامنہ ای کی الوداعی تقریبات کا آغاز دارالحکومت تہران سے کیا جائے گا، جہاں انکی میت کو آخری دیدار کے لیے رکھا جائے گا اور انہیں خراجِ عقیدت پیش کیا جائے گا۔

اس کے بعد 6 جولائی کو تہران میں باضابطہ جنازے کی تقریبات منعقد ہوں گی۔ تہران کے ڈپٹی میئر کے مطابق صرف دارالحکومت میں تقریباً 2 کروڑ افراد کی آمد کے پیشِ نظر لاجسٹکس اور ٹرانسپورٹ کے غیر معمولی انتظامات کیے جا رہے ہیں۔اِسی طرح 7جولائی کو مقدس شہر قم میں بھی جنازے کا جلوس منعقد کیا جائے گا۔

ایرانی سرکاری میڈیا کے مطابق 9 جولائی کو مشہد میں جنازے کی مرکزی تقریب کے بعد آیت اللہ علی خامنہ ای کو ان کے آبائی شہر مشہد میں واقع مقدس ترین مقام ’حرمِ امام رضا‘ میں سپردِ خاک کر دیا جائے گا۔

ایرانی میڈیا رپورٹس میں کہا گیا ہے کہ منتظمین کی دنیا بھر کے مسلمانوں اور ایران سے محبت کرنے والوں کو شرکت کی دعوت ہے۔

خیال رہے کہ علی خامنہ ای فروری میں ایران پر ہونے والے اسرائیلی امریکی حملوں میں شہید ہوئے تھے، علی خامنہ ای کی وفات کے ساتھ ایران میں تین دہائیوں پر مشتمل قیادت کا دور اختتام پذیر ہوا۔

آیت اللہ علی خامنہ ای 1939ء میں ایران کے شہر مشہد میں مقامی مذہبی رہنما جواد خامنہ ای کے گھر پیدا ہوئے تھے۔ ان کی پرورش نسبتاً سادہ اور محدود وسائل میں ہوئی۔ وہ اپنے بھائی بہنوں میں دوسرے نمبر پر تھے۔

مشہد کے ایک مدرسے میں ابتدائی تعلیم حاصل کرنے کے بعد وہ اعلیٰ دینی تعلیم کے لیے عراق کے شہر نجف گئے، جہاں وہ آیت اللہ روح اللہ خمینی کے شاگرد رہے۔وہ 1989 میں آیت اللہ خمینی کی وفات کے بعد انہیں ایران کا دوسرا سپریم لیڈر منتخب کیا گیا۔

آیت اللہ علی خامنہ ای تقریباً 37 برس تک ایران کے سپریم لیڈر رہے۔ ملک کے سیاسی، مذہبی اور سیکیورٹی معاملات میں انہیں مرکزی حیثیت حاصل تھی۔