مشہد: ایران کے سابق سپریم لیڈر آیت اللہ سید علی خامنہ ای کو مشہد میں حضرت امام علی رضاؑ کے روضے کے احاطے میں سپردِ خاک کر دیا گیا، جہاں لاکھوں سوگواروں کی موجودگی میں تدفین کی تمام رسومات مکمل کی گئیں۔

ایرانی سفارتخانے کی جانب سے جاری ایک تصویر کے ساتھ بیان میں کہا گیا کہ "خادمِ رضا آغوشِ رضا میں چلے گئے"، جبکہ ایرانی میڈیا کے مطابق تدفین سے قبل آیت اللہ خامنہ ای کی نماز جنازہ مشہد میں حضرت امام رضاؑ کے روضے کے احاطے میں ادا کی گئی۔

نماز جنازہ ان کے بڑے صاحبزادے آیت اللہ سید مصطفیٰ حسینی خامنہ ای نے پڑھائی۔ اس موقع پر لاکھوں افراد نے شرکت کی اور اپنے رہنما کے لیے دعائے مغفرت کی۔ رپورٹس کے مطابق خامنہ ای کے دیگر بھائی بھی پہلی صف میں موجود تھے، تاہم موجودہ سپریم لیڈر مجتبیٰ خامنہ ای تقریب میں شریک نہیں ہوئے۔

تدفین کے موقع پر مشہد کی سڑکوں پر شہریوں کی بڑی تعداد جمع ہوئی۔ سوگوار سرخ اور سیاہ پرچم اٹھائے ہوئے تھے جبکہ مختلف نعرے بھی لگائے گئے۔ سکیورٹی کے سخت انتظامات کیے گئے تھے اور شہر کے مختلف علاقوں میں آمدورفت کو محدود رکھا گیا۔

اس سے قبل آیت اللہ خامنہ ای کا جسدِ خاکی عراق کے شہر نجف سے ایران کے شہر مشہد پہنچایا گیا، جہاں ایرانی فضائیہ کے جنگی طیاروں نے اسے حفاظتی حصار میں ایئرپورٹ تک پہنچایا۔ نجف روانگی سے پہلے میت کو کربلا میں حضرت امام حسینؑ اور حضرت عباسؑ کے روضوں پر بھی لے جایا گیا، جہاں نماز جنازہ ادا کی گئی اور ہزاروں عقیدت مندوں نے آخری دیدار کیا۔

ایرانی حکام کے مطابق آخری رسومات کئی روز تک جاری رہیں، جبکہ مختلف شہروں میں تعزیتی اجتماعات اور دعائیہ تقریبات کا بھی انعقاد کیا گیا۔ سرکاری ذرائع کے مطابق تدفین کی کارروائی جنگ بندی کے بعد شروع ہونے والی مذہبی رسومات کے اختتام پر مکمل کی گئی۔