انٹارکٹیکا: دنیا کے سب سے جنوبی فعال آتش فشاں ماؤنٹ ایریبس نے ایک بار پھر سائنسدانوں کی توجہ اپنی جانب مبذول کر لی ہے، کیونکہ یہ منفرد آتش فشاں لاوا کے ساتھ ساتھ سونے کے انتہائی باریک ذرات بھی فضا میں خارج کرتا ہے، تاہم اس غیر معمولی عمل کی اصل وجہ آج بھی ایک معمہ بنی ہوئی ہے۔

غیر ملکی میڈیا رپورٹس کے مطابق ماؤنٹ ایریبس زمین پر موجود دیگر آتش فشاؤں سے مختلف خصوصیات رکھتا ہے۔ یہ دنیا کا واحد فعال آتش فشاں ہے جہاں مستقل لاوا جھیل موجود ہے، جبکہ یہی واحد آتش فشاں ہے جو خالص سونے کے مائیکرو اسکوپک کرسٹل فضا میں خارج کرتا ہے۔

1991 میں شائع ہونے والی ایک تحقیقی رپورٹ کے مطابق ماؤنٹ ایریبس روزانہ تقریباً 80 گرام سونے کے نہایت باریک کرسٹل خارج کرتا ہے، جو بعد ازاں اردگرد کے ماحول میں پھیل جاتے ہیں۔

سائنسدانوں کے مطابق ایک ممکنہ وضاحت یہ ہے کہ سونا کلورین یا سلفر سے بھرپور گرم آتش فشانی گیسوں کے ساتھ فضا میں بلند ہوتا ہے اور جیسے ہی یہ گیسیں ٹھنڈی ہوتی ہیں، سونا الگ ہو کر ننھے کرسٹل کی شکل اختیار کر لیتا ہے۔

تاہم ماہرین کا کہنا ہے کہ یہ نظریہ مکمل طور پر تسلی بخش نہیں، کیونکہ آتش فشانی گیسوں میں سونے کی مقدار انتہائی کم ہوتی ہے۔

دوسری ممکنہ وضاحت یہ پیش کی گئی ہے کہ سونے کے یہ باریک کرسٹل آتش فشاں کی لاوا جھیل کی سطح پر بتدریج بنتے ہیں اور بعد ازاں گیسوں کے ساتھ فضا میں خارج ہو جاتے ہیں۔

اس حیرت انگیز دریافت کو تین دہائیوں سے زائد عرصہ گزر چکا ہے، مگر جدید تحقیق کے باوجود سائنسدان اب تک یہ راز مکمل طور پر نہیں جان سکے کہ ماؤنٹ ایریبس سونے کے یہ خوردبینی کرسٹل کس عمل کے تحت تخلیق کرتا اور فضا میں خارج کرتا ہے۔