واشنگٹن: امریکی وزیر خزانہ اسکاٹ بیسنٹ نے ایران کے خلاف تاریخ کی سخت ترین پابندیاں عائد کرنے کا اعلان کرتے ہوئے خبردار کیا ہے کہ تہران کے ساتھ کاروباری تعلقات برقرار رکھنے والے ممالک کو بھی امریکی کارروائی کا سامنا کرنا پڑ سکتا ہے۔

امریکی نشریاتی ادارے کے مطابق اسکاٹ بیسنٹ نے کہا کہ امریکا ایران پر ایسی پابندیاں عائد کرنے کی تیاری کر رہا ہے جن کا مقصد ایرانی حکومت کی اپنے اتحادی مسلح گروہوں کے ذریعے کارروائیاں کرنے کی صلاحیت کو محدود کرنا ہے۔

امریکی وزیر خزانہ نے واضح کیا کہ جو ممالک ایران کے ساتھ تجارت یا کاروبار جاری رکھنے پر اصرار کریں گے، امریکا ان کے خلاف بھی اقدامات کرے گا۔ ان کے مطابق واشنگٹن ایران پر معاشی دباؤ مزید بڑھانے کے لیے وسیع پیمانے پر پابندیاں نافذ کرنے کا ارادہ رکھتا ہے۔

اسکاٹ بیسنٹ نے مزید کہا کہ امریکی حکومت کا مقصد ایرانی حکومت کا خاتمہ ہے۔ انہوں نے دعویٰ کیا کہ موجودہ امریکی اقدامات کے ذریعے تہران پر دباؤ بڑھایا جائے گا تاکہ ایران کی علاقائی سرگرمیوں اور اپنے اتحادی گروہوں کی معاونت کرنے کی صلاحیت کو محدود کیا جاسکے۔

امریکی وزیر خزانہ نے آبنائے ہرمز کی صورتحال پر بھی بات کرتے ہوئے کہا کہ انہیں یقین ہے کہ چین سمیت دنیا کے تمام ممالک اس اہم آبی گزرگاہ کو دوبارہ کھلتے ہوئے دیکھنا چاہتے ہیں۔

آبنائے ہرمز عالمی سطح پر تیل کی ترسیل کے لیے انتہائی اہم سمندری راستہ ہے، اس لیے اس کی بندش یا آمدورفت میں رکاوٹ سے عالمی توانائی منڈیوں اور تیل کی قیمتوں پر نمایاں اثرات مرتب ہوسکتے ہیں۔