واشنگٹن ڈی سی:امریکی وزیر خارجہ مارکو روبیو نے ایک بار پھر ایران کے ساتھ مذاکرات کی اہمیت پر زور دیتے ہوئے کہا ہے کہ واشنگٹن تہران کے ساتھ سفارت کاری کا راستہ بند نہیں کرنا چاہتا۔

غیر ملکی میڈیا رپورٹس کے مطابق مارکو روبیو کا کہنا تھا کہ امریکا ایران کے ساتھ اختلافات کے باوجود سفارتی حل کا خواہاں ہے، تاہم آبنائے ہرمز میں تجارتی جہازوں پر حملے کسی بھی مفاہمتی کوشش کے منافی ہیں اور اس طرح کے اقدامات کشیدگی میں مزید اضافہ کر سکتے ہیں۔

انہوں نے دعویٰ کیا کہ ایران مختلف ذرائع کے ذریعے مذاکرات میں دلچسپی کے اشارے دے رہا ہے، لیکن اگر تہران واقعی بات چیت چاہتا ہے تو اسے اپنے طرزِ عمل میں واضح تبدیلی لانا ہوگی۔

امریکی وزیر خارجہ کے مطابق ایران کو اندرونی معاشی مشکلات کا سامنا ہے، جس کے باعث ملک کی پالیسیوں پر مختلف حلقوں میں اختلافات بڑھتے جا رہے ہیں۔ ان کا کہنا تھا کہ ایرانی قیادت کے اندر ایک گروپ مذاکرات کے حق میں ہے، جبکہ دوسرا سخت مؤقف برقرار رکھنے کا حامی ہے۔

مارکو روبیو نے مزید کہا کہ اگر ایران میں مذاکرات کی حمایت کرنے والا دھڑا فیصلہ سازی میں مؤثر کردار ادا کرنے میں کامیاب ہو جاتا ہے تو اسے خطے میں کشیدگی کم کرنے اور سفارتی پیش رفت کے لیے مثبت اشارہ تصور کیا جا سکتا ہے۔