واشنگٹن: وائٹ ہاؤس نے واضح کیا ہے کہ امریکا اور ایران کے درمیان اس وقت جنگ کے خاتمے یا کسی نئے معاہدے کے لیے براہِ راست مذاکرات نہیں ہو رہے۔

عالمی خبر رساں ادارے کے مطابق وائٹ ہاؤس کی پریس سیکریٹری کیرولین لیویٹ نے فوکس نیوز کو دیے گئے ایک انٹرویو میں اس بات کی تصدیق کی۔ ان کا کہنا تھا کہ فی الحال امریکا اور ایران کے درمیان کوئی مذاکرات جاری نہیں اور یہ صورتحال اس وقت تک برقرار رہے گی جب تک امریکی صدر ڈونلڈ ٹرمپ کو یقین نہ ہو جائے کہ ایران بامعنی مذاکرات کے لیے سنجیدگی سے میز پر آنے کو تیار ہے۔

کیرولین لیویٹ نے کہا کہ صدر ڈونلڈ ٹرمپ کی اولین ترجیح یہ یقینی بنانا ہے کہ ایران کبھی جوہری ہتھیار حاصل نہ کرسکے۔ ان کے مطابق امریکا نے ایران کے خلاف فوجی کارروائی کے بعد اب اقتصادی دباؤ بڑھانے پر توجہ مرکوز کرلی ہے، تاہم صدر ٹرمپ کے پاس فوجی کارروائی سمیت تمام آپشنز اب بھی موجود ہیں۔

وائٹ ہاؤس کا بیان ایسے وقت میں سامنے آیا ہے جب قطر امریکا اور ایران کے درمیان سفارتی رابطے بحال کرنے کے لیے سرگرم کوششیں کر رہا ہے۔ قطر خطے میں جاری کشیدگی کم کرنے اور دونوں ممالک کو دوبارہ مذاکرات کی طرف لانے کے لیے سفارتی کوششیں تیز کرچکا ہے۔

دوسری جانب قطری وزیراعظم شیخ محمد بن عبدالرحمان آل ثانی نے جمعرات کو تہران کا دورہ کیا، جہاں انہوں نے ایرانی وزیر خارجہ عباس عراقچی سمیت اعلیٰ حکام سے ملاقاتیں کیں۔

قطر کی سفارتی کوششوں کا مقصد امریکا اور ایران کے درمیان کشیدگی کم کرنا اور ممکنہ مذاکرات کے لیے سازگار ماحول پیدا کرنا ہے۔ تاہم وائٹ ہاؤس کے تازہ بیان سے واضح ہوتا ہے کہ واشنگٹن فی الحال براہِ راست مذاکرات کے بجائے ایران پر دباؤ برقرار رکھنے کو ترجیح دے رہا ہے۔