مسی ساگا: عالمی شہرت یافتہ پاکستانی گلوکار و اداکار علی ظفر نے کینیڈا میں اپنے "روشنی ٹور 2026" کے اختتامی شو کے دوران شاندار پرفارمنس پیش کرتے ہوئے ہزاروں مداحوں کے دل جیت لیے۔

منتظمین کے مطابق مسی ساگا کے معروف سیلیبریشن اسکوائر میں منعقد ہونے والے اوپن ایئر کنسرٹ میں 45 ہزار سے زائد افراد نے شرکت کی، جسے اس مقام کی تاریخ کے سب سے بڑے میوزیکل ایونٹس میں شمار کیا جا رہا ہے۔

علی ظفر نے تقریباً دو گھنٹے تک اپنے مشہور گیتوں کی دھنیں بکھیرے رکھیں۔ انہوں نے "چھنو"، "مستی"، "جھوم" اور "چل دل میرے" سمیت اپنے نئے البم "روشنی" کے منتخب گانے بھی پیش کیے، جنہیں حاضرین کی جانب سے زبردست پذیرائی حاصل ہوئی۔

کنسرٹ کا سب سے یادگار منظر اس وقت دیکھنے میں آیا جب گیت "جھوم" کے دوران ہزاروں شائقین نے اپنے موبائل فونز کی روشنیاں فضا میں بلند کر دیں، جس سے پورا سیلیبریشن اسکوائر روشنیوں سے جگمگا اٹھا۔

اس موقع پر علی ظفر نے محبت، یکجہتی اور ثقافتی ہم آہنگی کے پیغام کو اجاگر کرتے ہوئے کہا کہ بیرونِ ملک مقیم پاکستانیوں کو اپنی ثقافت اور شناخت پر ہمیشہ فخر ہونا چاہیے۔ انہوں نے خواتین کے حقوق، نوجوان نسل کے خوابوں اور خاندانی اقدار کی اہمیت پر بھی روشنی ڈالی۔

تقریب کے اختتام پر حاضرین نے علی ظفر کے ساتھ مل کر ان کے مقبول گیت گائے اور اس شام کو پاکستانی موسیقی کی تاریخ کا ایک یادگار لمحہ قرار دیا۔