مظفر آباد:آزاد جموں و کشمیر قانون ساز اسمبلی کے انتخابات کے دوسرے مرحلے کی پولنگ مکمل ہونے کے بعد ووٹوں کی گنتی کا عمل جاری ہے، جبکہ مختلف انتخابی حلقوں سے غیرحتمی اور غیرسرکاری نتائج موصول ہونا شروع ہو گئے ہیں۔

دوسرے مرحلے میں مظفرآباد ڈویژن کے آٹھ انتخابی حلقوں اور مہاجرین کے لیے مختص 12 نشستوں پر پولنگ ہوئی۔ مظفرآباد ڈویژن کے بیشتر حلقوں میں ووٹنگ شام 6 بجے تک پرامن ماحول میں جاری رہی، تاہم حلقہ ایل اے 27 میں خراب موسم اور لینڈ سلائیڈنگ کے باعث انتخابی عملہ اور پولنگ کا سامان بروقت نہ پہنچ سکا، جس کے باعث اس حلقے کے تمام 196 پولنگ اسٹیشنوں پر انتخابات ملتوی کر دیے گئے۔

ابتدائی غیرحتمی اور غیرسرکاری نتائج کے مطابق پاکستان مسلم لیگ (ن) کو واضح برتری حاصل ہے، جبکہ پاکستان پیپلز پارٹی بھی چند حلقوں میں مضبوط پوزیشن برقرار رکھے ہوئے ہے۔

حلقہ ایل اے 25 نیلم ویلی ون کے 143 میں سے 11 پولنگ اسٹیشنوں کے نتائج کے مطابق مسلم لیگ (ن) کے شاہ غلام قادر ایک ہزار 433 ووٹ لے کر پہلے نمبر پر ہیں، جبکہ آل جموں و کشمیر مسلم کانفرنس کے عابد افضل ایک ہزار 18 ووٹ کے ساتھ دوسرے نمبر پر موجود ہیں۔

ایل اے 26 نیلم ویلی ٹو میں 135 میں سے 26 پولنگ اسٹیشنوں کے نتائج کے مطابق پاکستان پیپلز پارٹی کے میاں عبدالوحید تین ہزار 762 ووٹ حاصل کرکے سبقت لیے ہوئے ہیں، جبکہ مسلم لیگ (ن) کے شاہ غلام قادر تین ہزار 296 ووٹ کے ساتھ دوسرے نمبر پر ہیں۔

ایل اے 30 مظفرآباد فور کے تمام 129 پولنگ اسٹیشنوں کے غیرحتمی نتائج کے مطابق مسلم لیگ (ن) کے مصطفیٰ بشیر عباسی 17 ہزار 749 ووٹ لے کر کامیاب قرار پائے، جبکہ پیپلز پارٹی کے مبشر منیر اعوان 11 ہزار 947 ووٹ کے ساتھ دوسرے نمبر پر رہے۔

ایل اے 34 جموں ون میں 131 میں سے 51 پولنگ اسٹیشنوں کے نتائج کے مطابق مسلم لیگ (ن) کے ناصر حسین ڈار ایک ہزار 690 ووٹ لے کر پہلے جبکہ آل جموں و کشمیر مسلم کانفرنس کے محمد سعود مختار 741 ووٹ کے ساتھ دوسرے نمبر پر ہیں۔

ایل اے 35 جموں ٹو میں 142 میں سے 100 پولنگ اسٹیشنوں کے نتائج کے مطابق مسلم لیگ (ن) کے چودھری محمد اسماعیل 18 ہزار 788 ووٹ کے ساتھ نمایاں برتری حاصل کیے ہوئے ہیں، جبکہ آزاد امیدوار سردار محمد غیاث پانچ ہزار 41 ووٹ لے کر دوسرے نمبر پر ہیں۔

ایل اے 36 جموں تھری کے تمام 140 پولنگ اسٹیشنوں کے نتائج کے مطابق مسلم لیگ (ن) کے محمد احسن رضا 27 ہزار 218 ووٹ لے کر کامیاب ہو گئے، جبکہ پیپلز پارٹی کے احسن اسماعیل 12 ہزار 980 ووٹ کے ساتھ دوسرے نمبر پر رہے۔

ایل اے 37 جموں فور میں مسلم لیگ (ن) کی مریم جاوید 28 ہزار 664 ووٹ لے کر کامیاب قرار پائیں، جبکہ جموں کشمیر یونائیٹڈ موومنٹ کے عثمان علیم 22 ہزار 827 ووٹ حاصل کرکے دوسرے نمبر پر رہے۔

ایل اے 38 جموں فائیو کے 115 میں سے 48 پولنگ اسٹیشنوں کے نتائج کے مطابق مسلم لیگ (ن) کے ذیشان علی پانچ ہزار 483 ووٹ کے ساتھ پہلے جبکہ مسلم لیگ آزاد جموں و کشمیر کے محمد اکبر چودھری چار ہزار 935 ووٹ لے کر دوسرے نمبر پر ہیں۔

ایل اے 39 جموں سکس میں 157 میں سے 32 پولنگ اسٹیشنوں کے نتائج کے مطابق مسلم لیگ (ن) کے راجہ محمد صدیق دو ہزار 328 ووٹ حاصل کرکے آگے ہیں، جبکہ پیپلز پارٹی کے چودھری فخر زمان 650 ووٹ لے کر دوسرے نمبر پر ہیں۔

ایل اے 40 کشمیر ویلی ون کے 47 میں سے 23 پولنگ اسٹیشنوں کے نتائج کے مطابق پاکستان پیپلز پارٹی کے عامر عبدالغفار ایک ہزار 178 ووٹ لے کر پہلے جبکہ مسلم لیگ (ن) کے محمد نعیم خان 65 ووٹ کے ساتھ دوسرے نمبر پر ہیں۔

ایل اے 41 کشمیر ویلی ٹو کے تمام 19 پولنگ اسٹیشنوں کے نتائج کے مطابق مسلم لیگ (ن) کے محمد عامر شاہ ایک ہزار 804 ووٹ لے کر کامیاب ہو گئے، جبکہ آزاد امیدوار صباء دیوان 588 ووٹ کے ساتھ دوسرے نمبر پر رہیں۔

ایل اے 42 کشمیر ویلی تھری میں مسلم لیگ (ن) کے سید شوکت علی شاہ ایک ہزار 524 ووٹ لے کر کامیاب ہوئے، جبکہ پیپلز پارٹی کے محمد عاصم شریف 477 ووٹ حاصل کر سکے۔

ایل اے 43 کشمیر ویلی فور کے تمام نتائج کے مطابق مسلم لیگ (ن) کے محمد یاسین لون ایک ہزار 276 ووٹ لے کر کامیاب ہوئے، جبکہ پیپلز پارٹی کے جاوید بٹ 563 ووٹ کے ساتھ دوسرے نمبر پر رہے۔

ایل اے 44 کشمیر ویلی فائیو میں مسلم لیگ (ن) کے محمد احمد رضا قادری ایک ہزار 700 ووٹ لے کر کامیاب قرار پائے، جبکہ آل جموں و کشمیر مسلم کانفرنس کی مہرالنساء 650 ووٹ کے ساتھ دوسرے نمبر پر رہیں۔

ایل اے 45 کشمیر ویلی سکس کے تمام پولنگ اسٹیشنوں کے نتائج کے مطابق پاکستان پیپلز پارٹی کے عبدالماجد خان تین ہزار 448 ووٹ لے کر کامیاب ہوئے، جبکہ آل جموں و کشمیر مسلم کانفرنس کے خواجہ محمد دلاور 823 ووٹ حاصل کرکے دوسرے نمبر پر رہے۔

ابتدائی غیرحتمی اور غیرسرکاری نتائج کے مطابق مجموعی طور پر مسلم لیگ (ن) کو دوسرے مرحلے میں واضح برتری حاصل ہے، تاہم متعدد حلقوں میں ووٹوں کی گنتی کا عمل جاری ہے اور حتمی نتائج الیکشن کمیشن کی جانب سے باضابطہ طور پر جاری کیے جائیں گے۔