اے آئی کی تیز رفتار ترقی جہاں مختلف شعبوں میں نئی سہولتیں فراہم کر رہی ہے، وہیں اس کا غلط استعمال سائبر جرائم میں بھی تیزی سے اضافہ کر رہا ہے۔ غیر ملکی میڈیا رپورٹس کے مطابق مصنوعی ذہانت پر مبنی فراڈ کے باعث امریکی شہریوں کو صرف ایک سال کے دوران تقریباً 2 کھرب 48 ارب روپے کا مالی نقصان برداشت کرنا پڑا۔

رپورٹس کے مطابق امریکی تحقیقاتی ادارے ایف بی آئی نے خبردار کیا ہے کہ مصنوعی ذہانت کی مدد سے کیے جانے والے مالیاتی جرائم میں مسلسل اضافہ ہو رہا ہے۔ ادارے کے مطابق سرمایہ کاری سے متعلق دھوکا دہی کے واقعات میں سب سے زیادہ نقصان ریکارڈ کیا گیا، جہاں متاثرین کو مجموعی طور پر ایک کھرب 75 ارب ڈالر سے زائد کا نقصان پہنچنے کا تخمینہ لگایا گیا ہے۔

ماہرین کا کہنا ہے کہ ڈیپ فیک ٹیکنالوجی سائبر جرائم پیشہ افراد کا ایک مؤثر ہتھیار بنتی جا رہی ہے۔ اس ٹیکنالوجی کے ذریعے کسی بھی شخص کے چہرے، آواز اور ویڈیوز کی انتہائی حقیقی نقل تیار کی جا سکتی ہے، جس کے باعث عام صارفین کے لیے اصلی اور جعلی مواد میں فرق کرنا مشکل ہو جاتا ہے۔

رپورٹس کے مطابق صرف چند سیکنڈز کی آڈیو ریکارڈنگ کی مدد سے کسی بھی فرد کی آواز کی تقریباً 85 فیصد تک نقل تیار کرنا ممکن ہو چکا ہے۔ اس صلاحیت کو استعمال کرتے ہوئے جعلساز بینکوں، سرمایہ کاری کمپنیوں، سرکاری اداروں یا قریبی رشتہ داروں کی آواز میں کالز کرکے لوگوں کو مالی نقصان پہنچا رہے ہیں۔

ایف بی آئی نے اس بات پر بھی تشویش کا اظہار کیا ہے کہ مصنوعی ذہانت کے جدید ماڈلز اور مختلف نظاموں تک غیر مجاز رسائی حاصل کرنے کی کوششیں جاری ہیں، جس سے سائبر سکیورٹی کے خطرات مزید بڑھ گئے ہیں۔

ماہرین نے صارفین کو مشورہ دیا ہے کہ کسی بھی مشتبہ فون کال، ویڈیو پیغام یا سرمایہ کاری کی پیشکش پر فوری اعتماد نہ کریں، ذاتی معلومات اور بینکنگ تفصیلات شیئر کرنے سے گریز کریں اور کسی بھی مالی لین دین سے قبل متعلقہ ادارے سے براہ راست تصدیق ضرور کریں۔