نیوزڈیسک:ایک نئی تحقیق سے معلوم ہوا ہے کہ مصنوعی ذہانت (اے آئی) کو اپنانے والی برطانوی کمپنیاں کارکردگی، آمدنی اور اخراجات کے حوالے سے نمایاں فوائد حاصل کر رہی ہیں، جبکہ پرانے اور لندن سے باہر موجود کاروبار اس ٹیکنالوجی کے استعمال میں نسبتاً پیچھے رہ گئے ہیں۔

اِنٹیوٹ کی ’’اے آئی امپیکٹ رپورٹ 2026‘‘ میں کوئک بُکس استعمال کرنے والے 53 لاکھ سے زائد کاروباروں کے گمنام انتظامی ڈیٹا اور برطانیہ، امریکا، کینیڈا اور آسٹریلیا کے 34 ہزار سے زائد کاروباری اداروں کے سرویز کا جائزہ لیا گیا۔

رپورٹ کے مطابق برطانیہ کی 70 فیصد کمپنیاں اب کسی نہ کسی سطح پر اے آئی ٹیکنالوجی استعمال کر رہی ہیں۔ سروے میں شامل 77 فیصد کاروباروں نے بتایا کہ اے آئی کی بدولت ان کی پیداواری صلاحیت میں اضافہ ہوا، جبکہ 43 فیصد اداروں کا کہنا تھا کہ اس ٹیکنالوجی نے ان کی آمدنی بڑھانے میں مدد دی۔

تحقیق میں یہ بھی سامنے آیا کہ 27 فیصد کاروباروں کے کام کے اوقات میں کمی آئی، جبکہ 28 فیصد کمپنیوں نے اخراجات میں کمی کا تجربہ کیا۔

رپورٹ کے مطابق پرانی کمپنیاں نئی کمپنیوں کے مقابلے میں اے آئی اپنانے کے معاملے میں 35 فیصد کم متحرک ہیں۔ دوسری جانب لندن میں قائم کاروبار قومی اوسط کے مقابلے میں روزانہ اے آئی استعمال کرنے کے 13.8 فیصد زیادہ امکانات رکھتے ہیں۔