بیلجیئم میں سیوریج لائن کی تبدیلی کے لیے جاری کھدائی کے دوران تعمیراتی کارکنوں کو سونے کی سلاخوں، نایاب سکوں اور دیگر قیمتی اشیا پر مشتمل ایک حیران کن خزانہ مل گیا، جس کی مجموعی مالیت تقریباً 90 لاکھ یورو بتائی جا رہی ہے۔

غیر ملکی میڈیا رپورٹس کے مطابق یہ تاریخی خزانہ برسلز سے تقریباً 30 کلومیٹر شمال مغرب میں واقع سینٹ گِلس ڈینڈرمونڈے کے علاقے میں زیرِ زمین پائپ تبدیل کرنے کے معمول کے کام کے دوران دریافت ہوا۔ خزانہ 18 سالہ طالب علم کوبے نے تلاش کیا، جو موسمِ گرما کی تعطیلات کے دوران عارضی کارکن کے طور پر تعمیراتی کام میں مصروف تھا۔

رپورٹس کے مطابق کوبے اپنے ساتھی کارکنوں کے ہمراہ منگل کے روز کھدائی کر رہا تھا کہ اسے زمین کے اندر کچھ غیر معمولی چیز دکھائی دی۔ ابتدا میں اسے گمان ہوا کہ شاید وہاں چند سکے پڑے ہیں، تاہم مزید کھدائی کے دوران سونے کی ایک سلاخ سامنے آئی، جس کے بعد کارکنوں کو اندازہ ہوا کہ یہ معمولی دریافت نہیں بلکہ ایک بڑا خزانہ ہے۔

بیلجیئم کے ذرائع ابلاغ کے مطابق خزانے میں سونے کے سکے، سونے کے ڈلے اور متعدد سونے کی سلاخیں شامل ہیں۔ قیمتی اشیا ایک تھیلے میں محفوظ تھیں، جسے مبینہ طور پر ایک پرانی حویلی کی دیوار کے اندر اینٹوں کے ذریعے چھپا کر رکھا گیا تھا۔ یہ حویلی 19ویں صدی کے اواخر میں تعمیر کی گئی تھی، جس سے خزانے کی تاریخ اور اصل کے حوالے سے بھی کئی سوالات پیدا ہوگئے ہیں۔

خزانہ ملنے کی اطلاع ملتے ہی متعلقہ حکام نے جائے وقوعہ کو محفوظ بنا لیا اور تمام قیمتی اشیا کو برسلز میں ایک محفوظ مقام پر منتقل کردیا۔ اب تفتیش کار اس خزانے کی اصل، اسے چھپانے والے افراد اور اس کی قانونی ملکیت کا تعین کرنے میں مصروف ہیں۔

بیلجیئم کے قانون کے مطابق ایسی قیمتی دریافت کے معاملے میں اصل مالک یا اس کے قانونی وارثوں کو سامنے آنے کا موقع دیا جاتا ہے اور دریافت کرنے والے شخص کو کم از کم پانچ سال تک انتظار کرنا پڑ سکتا ہے۔

18 سالہ کوبے نے بھی اعتراف کیا کہ کارکنوں کو معلوم تھا کہ اتنی بڑی مقدار میں قیمتی اشیا ملنے کی صورت میں انہیں قانون کے مطابق حکام کے حوالے کرنا ضروری ہے۔ تاہم نوجوان نے امید ظاہر کی کہ اگر خزانے کا کوئی حقیقی مالک سامنے نہ آیا تو مستقبل میں اس غیر معمولی دریافت پر اسے اور دیگر متعلقہ افراد کو کسی قسم کا انعام مل سکتا ہے۔