تحریر محسن وقار علی:

17 جولائی 2026ء کو شائقین کرکٹ نے یہ جانکاہ خبر سنی کہ عظیم ویسٹ انڈین آل راؤنڈر، سر گیری سوبرز 89 سال کی عمر میں انتقال کر گئے ۔ اگرچہ ان کے کارنامے اتنے وسیع اور متنوع ہیں کہ ان پر ایک مکمل کتاب لکھی جا سکتی ہے ، یہاں ان کا ایک اجمالی جائزہ پیش کیا جا رہا ہے۔

دنیا میں ایسے لوگوں کی تعداد بہت کم ہے جو دونوں ہاتھوں سے یکساں مہارت کے ساتھ لکھ سکیں، کوئی چیز پھینک سکیں (جیسے کہ گیند) یا باریک فنّی کام انجام دے سکیں۔ ایسے لوگوں کو انگریزی میں ایمبی ڈیکسٹرس کہتے ہیں۔ ایمبی ڈیکسٹرسٹی کی یہ نعمت جتنی نایاب ہے، کرکٹ میں سچی آل راؤنڈ صلاحیت بھی اسی قدر کمیاب ہے۔ زیادہ تر کھلاڑی ایک ہی شعبے کے سہارے پہچانے جاتے ہیں، مگر کبھی کبھار ایسے نابغہ روزگار کھلاڑی بھی جنم لیتے ہیں جن کی بیٹنگ، بولنگ اور فیلڈنگ— سبھی — اپنی اپنی جگہ اکمل ہوں۔ سوبرز ایک ایسے ہی نابغہ روزگار کھلاڑی ہیں جن کے ہمہ گیر و ہمہ جہت کارنامے انسانی فطرت کی اس نادر صلاحیت کا جیتا جاگتا ثبوت ہیں۔

گیری سینٹ آبرن سوبرز 28 جولائی 1936ء کو بارباڈوس کے علاقے سینٹ مائیکل میں پیدا ہوئے۔ وہ سات بہن بھائیوں میں چھٹے نمبر پر تھے۔ دلچسپ بات یہ ہے کہ سوبرز پیدائشی طور پر دونوں ہاتھوں میں ایک ایک اضافی انگلی کے ساتھ پیدا ہوئے تھے۔ دس سال کی عمر میں انہوں نے ٹان کے لگانے والے دھاگے سے ایک انگلی اور پھر 14 سال کی عمر میں چاقو کی مدد سے دوسری انگلی کو خود ہی الگ کر دیا تھا۔

ان کے والد، جو ایک جہاز ران تھے جنوری 1942ء میں دوسری جنگِ عظیم کے دوران سمندر میں جرمن آبدوز کے حملے میں انتقال کر گئے تھے۔ ان کی پرورش ان کی والدہ نے کی۔ سوبرز نے بچپن میں ٹینس بال سے گلی محلے کی کرکٹ کھیلی، اسی مشق نے انہیں گیند کو "ٹاپ آف دی باؤنس" پر کھیلنے کا وہ فن سکھایا جو بعد میں ان کی پہچان بنا۔ انہوں نے 17 سال، 8 ماہ اور 2 دن کی عمر میں اپنے ٹیسٹ کیریئر کا آغاز 30 مارچ 1954ء کو انگلینڈ کے خلاف کنگسٹن، جمیکا سے کیا اور ٹھیک 20 سال بعد 30 مارچ 1974ء کو اسی حریف کے خلاف پورٹ آف اسپین، ٹرینیڈاڈ پر 37 سال، 8 ماہ اور 2 دن کی عمر میں اپنا 93 واں اور آخری میچ کھیلا۔ ان 93 میچوں میں سوبرز نے 160 اننگ میں 21 مرتبہ ناٹ آؤٹ رہتے ہوئے 57.78 کی اوسط سے 8032 رنز سکور کیے جس میں 26 سنچریاں اور 30 نصف سنچریاں شامل تھیں، *365 ان کا بہترین سکور رہا۔ 5 مرتبہ نروس نائنٹیز میں پھنسنے والے سوبرز 12 مرتبہ صفر کا شکار ہوئے۔ فیلڈ میں انہوں نے 109 کیچ بھی لیے۔

بالنگ میں انہوں نے 21599 گیندیں(3599.5 اوورز) پھینک کر 34.03 کی اوسط اور 91.9 کے سٹرائیک ریٹ سے 235 وکٹ حاصل کیے، 6 مرتبہ اننگ میں 5 وکٹ لینے والے سوبرز کی اننگ میں بہترین بالنگ 6/73 جبکہ میچ میں بہترین تجزیہ 8/80 رہا۔ اس دوران انہوں نے 2.22 کے اکانومی ریٹ سے رنز دیے۔

اگر اسے ہر ملک کے خلاف کارکردگی میں بانٹا جائے تو کچھ یہ تصویر سامنے آئے گی:

آسٹریلیا: 19 میچ، 38 اننگ، 3 ناٹ آؤٹ، 1510 رنز، 43.14 اوسط، 4 سنچریاں، 6 نصف سنچریاں، 168 بہترین سکور، 1 صفر، 27 کیچ

بالنگ: 4895 گیندیں (815.5 اوورز)، 51 وکٹ، 39.68 اوسط، 2 مرتبہ اننگ میں 5 وکٹ، 6/73 اننگ میں بہترین بالنگ، 7/103 میچ میں بہترین تجزیہ، 2.48 اکانومی ریٹ

انگلینڈ: 36 میچ، 61 اننگ، 8 ناٹ آؤٹ، 3214 رنز، 60.64 اوسط، 10 سنچریاں، 13 نصف سنچریاں، 226 بہترین سکور، 6 صفر، 40 کیچ

بالنگ: 8771 گیندیں (1461.5 اوورز)، 102 وکٹ، 32.57 اوسط، 3 مرتبہ اننگ میں 5 وکٹ، 5/41 اننگ میں بہترین بالنگ، 8/80 میچ میں بہترین تجزیہ، 2.27 اکانومی ریٹ

انڈیا: 18 میچ، 30 اننگ، 7 ناٹ آؤٹ، 1920 رنز، 83.47 اوسط، 8 سنچریاں، 7 نصف سنچریاں، 198 بہترین سکور، 2 صفر، 27 کیچ

بالنگ: 4301 گیندیں (716.5 اوورز)، 59 وکٹ، 25.69 اوسط، 1 مرتبہ اننگ میں 5 وکٹ، 5/63 اننگ میں بہترین بالنگ، 7/98 میچ میں بہترین تجزیہ، 2.11 اکانومی ریٹ

پاکستان: 8 میچ، 13 اننگز، 2 ناٹ آؤٹ، 984 رنز، 89.45 اوسط، 3 سنچریاں، 4 نصف سنچریاں، *365 بہترین سکور، 1 صفر، 4 کیچ

بالنگ: 1425 گیندیں (237.3 اوورز)، 4 وکٹ، 113.5 اوسط، 2/41 اننگ میں بہترین بالنگ، 3/55 میچ میں بہترین تجزیہ، 1.91 اکانومی ریٹ

نیوزی لینڈ: 12 میچ، 18 اننگ، 1 مرتبہ ناٹ آؤٹ، 404 رنز، 23.76 اوسط، 1 سنچری، 142 بہترین سکور، 2 صفر، 11 کیچ

بالنگ: 2207 گیندیں (367.5 اوورز)، 19 وکٹ، 35.89 اوسط، 4/64 اننگ اور میچ میں بہترین بالنگ، 1.85 اکانومی ریٹ

ہمہ گیر صلاحیتیں: ان کی بیٹنگ کا ایک خاص پہلو ان کا منفرد 'اسٹانس' تھا۔ وہ کریز پر انتہائی پرسکون اور سادہ انداز میں کھڑے ہوتے تھے۔ ان کے پیروں کا توازن اور بلے کا بہاؤ اتنا ہموار ہوتا تھا کہ وہ کسی بھی گیند کو، کسی بھی سمت میں، صرف کلائی کے ایک ہلکے سے جھٹکے سے باؤنڈری کے پار بھیج سکتے تھے۔ یہی وہ ٹائمنگ تھی جو انہیں بڑے بڑے باؤلرز کے خلاف بھی واضح برتری دلاتی تھی۔

سوبرز کی باؤلنگ میں سب سے زیادہ حیران کن چیز تین مختلف انداز سے باؤلنگ کرنے کی صلاحیت تھی۔ وہ نئی گیند کے ساتھ طوفانی فاسٹ میڈیم سوئنگ بالنگ، پھر گیند کی چمک ختم ہونے پر لیفٹ آرم آرتھوڈوکس اسپن اور ضرورت پڑنے پر 'چائنامین' (Wrist Spin) بھی کر لیتے تھے۔ یہ ہمہ جہت صلاحیت کرکٹ کی تاریخ میں کسی اور آل راؤنڈر میں اتنی مہارت کے ساتھ کبھی نہیں دیکھی گئی۔ فیلڈنگ میں ان کی پھرتی کسی شکاری بلی سے کم نہ تھی۔ وہ اکثر 'شارٹ لیگ' یا 'سلی پوائنٹ' پر بلے باز کے اتنا قریب کھڑے ہوتے تھے کہ گیند کے بیٹ سے ٹکرانے کی آواز آنے سے پہلے ہی وہ فضا میں اچھل کر اسے قابو کر چکے ہوتے تھے۔

چنیدہ چنیدہ ریکارڈ:

1:بہترین انفرادی اننگ کا عالمی ریکارڈ: (*365) بمقابلہ پاکستان، کنگسٹن، جمیکا، 1 مارچ 1958ء

اس سیریز سے قبل سوبرز 14 میچوں میں 30.55 کی اوسط سے محض 672 رنز ہی بنا سکے تھے لیکن اس سیریز کے اختتام تک پوری دنیا جان چکی تھی کہ وہ کتنے خاص الخاص ہیں۔

پاکستان کے 328 رنز کے جواب میں دوسرے دن کھیل کے اختتام پر ویسٹ انڈیز کا سکور 1-147 تھا، جو اگلے دن بڑھ کے 1-504 ہو گیا۔ انہوں نے کونریڈ ہنٹ کے ساتھ مل کر پورے دن بیٹنگ کی تھی اور سکور میں 357 رنز کا اضافہ کیا تھا، دن کے اختتام پر وہ 228 رنز پر کھیل رہے تھے۔ چوتھے دن وہ 21 سال، 7 مہینے اور 1 دن کی عمر میں، پہلے تاریخ کے کم عمر ترین ٹرپل سنچورین بنے، پھر کم عمر ترین ورلڈ ریکارڈ ہولڈر بھی۔ اپنی *365 رنز کی اننگ کے دوران انہوں نے 614 منٹ بیٹنگ کرکے 38 چوکے رسید کیے تھے۔

اگلے 36 سال، ایک مہینے اور 17 دنوں تک وہ اس ریکارڈ کے مالک رہے (جو آج بھی اس ریکارڈ کے لیے طویل ترین عرصہ ہے) اس دوران 809 میچ کھیلے گئے تھے۔

نوٹ: سوبرز پہلے کھلاڑی ہیں جس نے اپنی اولین سنچری کو ٹرپل سنچری میں بدلا۔

نوٹ 2: وہ آج بھی ٹرپل سنچری اور بہترین انفرادی اننگ کا ریکارڈ بنانے والے کم عمر ترین کھلاڑی ہیں۔

نوٹ 3: پاکستان کے خلاف اس سیریز میں سوبرز نے 137.33 کی اوسط سے 824 رنز بنائے، بشمول 3 سنچریوں اور 3 نصف سنچریوں کے۔ یہ کسی 5+ میچ کی سیریز میں چھٹی بہترین کارکردگی ہے۔

2: ٹیسٹ کرکٹ میں سب سے زیادہ رنز: 4 اپریل 1974ء کو جب سوبرز کا آخری ٹیسٹ اختتام پذیر ہوا تو اس وقت وہ 8032 رنز کے ساتھ ٹیسٹ کرکٹ میں سب سے زیادہ رنز بنانے والے بلے باز تھے۔ وہ ٹیسٹ کرکٹ میں 8000 رنز کے سنگ میل تک پہنچنے والے اولین بلے باز ہیں۔

3: آل راؤنڈ جادو: آج تک 16 آل راؤنڈرز نے 22 مرتبہ پانچ سے زائد میچوں کی سیریز میں 250+ رنز بنانے کے ساتھ ساتھ 20+ وکٹیں لی ہیں (سوبرز اور بوتھم دونوں تین تین مرتبہ یہ کارنامہ سر انجام دے کر سر فہرست ہیں) لیکن۔۔۔۔

سوبرز تاریخ کے واحد آل راؤنڈر ہیں جنہوں نے ایک سیریز میں 400+ رنز اور 20+ وکٹوں کا کارنامہ دو مرتبہ سر انجام دیا ہو۔(7 آل راؤنڈرز نے 8 مرتبہ یہ کارنامہ سر انجام دیا ہے) اس میں 1966ء کا دورہ انگلینڈ بھی شامل تھا جہاں سوبرز نے 103.14 کی اوسط سے 722 رنز بنانے کے ساتھ ساتھ 27.25 کی اوسط سے 20 وکٹ بھی لیے، گویا انکی بیٹنگ اوسط اور بالنگ اوسط میں فرق، 75.89 رنز تھا، 10 کیچ اس کے علاوہ تھے۔ یاد رہے کہ سوبرز یہاں کپتان بھی تھے۔ سوبرز کسی سیریز میں 600+ رنز بنانے اور 20+ وکٹ لینے والے واحد آل راؤنڈر ہیں۔ مذکورہ بالا سیریز کے تیسرے میچ میں سوبرز نے 3 اور 94 رنز کی اننگ کھیلیں، اگر وہ یہاں سنچری سکور کر لیتے تو لگاتار 4 میچوں میں سنچریاں سکور کرنے والے بلے باز بن جاتے۔ سیریز کے آخری میچ میں بھی انہوں نے 81 رنز کی اننگ کھیلی۔

اس سے قبل 1961/62ء کے دورہ ہندوستان میں وہ تاریخ کے اولین آل راؤنڈر بنے تھے جس نے ایک سیریز میں بیٹنگ اوسط (70.67) اور بالنگ اوسط (20.57) کے مابین 50+ رنز کا فرق حاصل کیا ہو۔

ان کے علاوہ یہ نایاب کارنامہ صرف جنوبی افریقہ کے شان پولاک ہی سر انجام دے سکے ہیں۔(جبکہ سوبرز نے یہی کارنامہ دو مرتبہ سر انجام دیا ہے)

ایک مرتبہ میچ کی دونوں اننگ میں سنچری سکور کرنے والے سوبرز نے دو مرتبہ میچ میں سنچری کے ساتھ اننگ میں 5 وکٹ بھی لیے۔

سوبرز: کپتان بمقابلہ کھلاڑی

سوبرز 39 میچوں میں کپتان بھی رہے جہاں انہوں نے 9 میچوں میں فتوحات کے ساتھ ساتھ 10 میچوں میں شکست کا ذائقہ بھی چکھا جبکہ 20 میچ ڈرا ہوئے۔ بطور کپتان ان کے اعدادوشمار یہ رہے:

39 میچ, 71 اننگ، 11 مرتبہ ناٹ آؤٹ، 3528 رنز، 58.8 اوسط، 11 سنچریاں، 15 نصف سنچریاں, *178 بہترین سکور، 7 صفر، 48 کیچ

بالنگ: 10860 گیندیں (1810 اوورز)، 117 وکٹ، 34 اوسط، 3 مرتبہ اننگ میں 5 وکٹ، 6/73 اننگ میں بہترین بالنگ، 8/80 میچ میں بہترین تجزیہ، 2.19 اکانومی ریٹ

نوٹ: سوبرز نے پاکستان کے خلاف کوئی میچ بطور کپتان نہیں کھیلا لیکن باقی 4 ممالک میں سے ہر ایک کے خلاف بطور کپتان ایک سنچری ضرور سکور کی۔

بطور عام کھلاڑی: 54 میچ، 89 اننگ، 10 مرتبہ ناٹ آؤٹ، 4504 رنز، 57.01 اوسط، 15 سنچریاں، 15 نصف سنچریاں، *365 بہترین سکور، 5 صفر، 61 کیچ

بالنگ: 10739 گیندیں (1789.5 اوورز)، 118 وکٹ، 34.07 اوسط، 3 مرتبہ اننگ میں 5 وکٹ، 5/60 اننگ میں بہترین بالنگ، 7/140 میچ میں بہترین تجزیہ، 2.24 اکانومی ریٹ

بہترین دور: سر ڈان بریڈ مین کی 99.94 کی اوسط کرکٹ میں سب سے مشہور عدد ہے جو 80 اننگ پر مشتمل کیریئر میں حاصل کیا گیا۔ اب کوئی کھلاڑی اتنی یا اس سے زیادہ اننگ پر مشتمل مکمل کیریئر میں تو ڈان کے برابر نہ آ سکا لیکن اکثر اوقات کئی کھلاڑی وقتی طور پر ایسا عروج ضرور حاصل کرتے رہے۔ یہاں اسے دو زمروں میں تقسیم کیا جا رہا ہے

1:طویل مدتی: 21 سال، 6 مہینے اور 8 دن کی عمر میں اپنی اننگ نمبر 28 (پاکستان کے خلاف پورٹ آف سپین ٹیسٹ کی دوسری اننگ میں 80 رنز) سے 31 سال، 7 ماہ اور 1 دن کی عمر میں اپنی اننگ نمبر 107 (انگلینڈ کے خلاف بارباڈوس ٹیسٹ کی پہلی اننگ میں 68 رنز) تک، دس سال کے طویل عرصے میں سوبرز نے لگاتار 80 اننگ میں 73.07 کی ناقابل یقین اوسط قائم رکھی۔ اس دوران انہوں نے 18 سنچریوں کی مدد سے 4969 رنز سکور کیے۔

یاد رہے کہ ان کا کوئی ایک مستقل نمبر بھی نہیں تھا اور یہ سارے رنز انہوں نے اوپنر سے ساتویں نمبر پر بیٹنگ کرتے ہوئے بنائے، لیکن پھر بھی سوائے ساتویں نمبر کے، جہاں ان کا بہترین سکور 95 رہا، باقی ہر جگہ کم از کم ایک سنچری ضرور سکور کی۔

بطور بالر، اس عرصے کے دوران انہوں نے 32.43 کی اوسط سے 130 وکٹ لیے، جس میں 4 مرتبہ اننگ میں 5 وکٹ کی کارکردگی شامل تھی۔ 5/41 ان کی بہترین بالنگ رہی۔ فیلڈ میں انہوں نے 74 کیچ بھی پکڑے۔ اس عرصے میں انکی بیٹنگ اور بولنگ اوسط کے مابین فرق 40.64 رنز رہا۔۔

2:مختصر مدتی: اسی سنہرے دور میں بھی 1958ء کا سال ان کے لیے "ہیرے کا سال" ثابت ہوا، جب انہوں نے 7 میچوں کی 12 اننگ میں 132.55 کی اوسط سے 1193 رنز سکور کیے، بشمول 5 سنچریوں اور 3 نصف سنچریوں کے۔

نوٹ: کولکتہ میں 31 دسمبر کو انڈیا کے خلاف شروع ہونے والے ٹیسٹ میں بھی سوبرز نے 106 کی اننگ کھیلی لیکن۔۔۔۔ یہ اننگ میچ کے دوسرے دن کھیلی گئی تھی لہذا میں اسے 1958ء میں شامل نہیں کر رہا۔

یہ 1964ء تک کسی ایک سال میں سب سے زیادہ رنز کا ریکارڈ رہا۔ ان کی اس سال کی اوسط البتہ آج بھی سال میں کم از کم ہزار رنز بنانے والے بلے بازوں میں بہترین ترین ہے۔

ان کا دوسرا مختصر مدتی عروج، 26 مارچ 1959ء کو لاہور (باغ جناح) پر پاکستان کے خلاف 72 رنز کی اننگ سے لے کر 9 دسمبر 1960ء کو برسبین پر آسٹریلیا کے خلاف پہلی اننگ میں 132 رنز تک رہا۔ اس دوران انہوں نے 10 اننگ میں ایک مرتبہ ناٹ آؤٹ رہتے ہوئے 101.44 کی اوسط سے 913 رنز بنائے، بشمول 4 سنچریوں (1 ڈبل) اور 2 نصف سنچریوں کے۔

ایک اوور میں چھ چھکے: 31 اگست 1968ء کوسوانسی (Swansea) کے مقام پر ناٹنگھم شائر کے لیے کھیلتے ہوئے گلیمورگن کے خلاف جب گیری سوبرز بیٹنگ کے لیے آئے تو سکور 5/308 تھا اور وہ بطور کپتان اننگ ڈکلیر کرنے سے پہلے زیادہ سے زیادہ رنز بنانا چاہتے تھے۔ گلمورگن کے میلکم نیش اس وقت تک اپنی میڈیم پیس بالنگ سے 4 وکٹ لے چکے تھے۔ ان کے کپتان ٹونی لیوئس نے رنز کے بہاؤ کو روکنے کے لیے انہیں سپن بالنگ کرنے کا مشور دیا جو ایک سنگین ترین غلطی ثابت ہوا۔

پہلی گیند: سوبرز نے گیند کو اپنے "سوئنگنگ آرک" میں پایا تو اسے ڈیپ مڈ-وکٹ پر باؤنڈری ہی نہیں، بلکہ میدان کے پار پہنچانے میں کوئی غلطی نہیں کی ۔

دوسری گیند: اگلی گیند قدرے چھوٹی تھی لیکن سوبرز نے اسے ایک بار پھر اپنی طاقتور کلائیوں کی مدد سے ڈیپ اسکوائر لیگ باؤنڈری کے پار پہنچا دیا۔

تیسری گیند: نیش نے گیند کو فل پچ رکھا تو سوبرز نے قدموں کا معمولی سا استعمال کرتے ہوئے پوری طاقت سے بلّا گھمایا اور گیند سائٹ سکرین باؤنڈری کے پار پہنچ گئی۔

چوتھی گیند: نیش نے اگلی گیند ایک بار پھر شارٹ کرائی اور سوبرز نے ایک بار پھر اسے ڈیپ فائن-لیگ باؤنڈری کے اوپر سے چھکے میں بدل دیا۔

پانچویں گیند: یہاں کہانی میں ایک موڑ آیا۔ سوبرز نے اسے لانگ-آف کی جانب اونچا کھیلا جہاں راجر ڈیوس نے کیچ تو پکڑ لیا لیکن باؤنڈری پر اپنا توازن برقرار نہ رکھ سکے اور گیند کے ساتھ ہی رسی کے باہر جا گرے۔ کچھ دیر کے لیے تو کھلاڑی اور امپائر سبھی حیران رہے کہ آخر ہوا کیا، سوبرز نے تو پویلین کی جانب چلنا بھی شروع کر دیا تھا کہ امپائر نے اسے بھی چھکا قرار دیا۔ اب سوبرز تاریخ رقم کرنے سے محض ایک قدم دور تھے۔

چھٹی گیند: لیوئس نے جب سبھی فیلڈر لیگ سائیڈ باؤنڈری پر لگائے تو سوبرز کو اندازہ ہو گیا کہ آخری گیند شارٹ ہو گی،جو جہ درست ثابت ہوا۔ گیند شارٹ بھی تھی اور تیز بھی لیکن انہوں نے اسے بھی ڈیپ اسکوائر-لیگ پر میدان کے باہر پہنچا دیا!

ایک اوور میں 36 رنز، یہ وہ منظر تھا جس نے دنیائے کرکٹ کو ہمیشہ کے لیے بدل دیا۔ سوبرز اس اننگ میں 76 رنز پر ناٹ آؤٹ رہے اور ان کی اس دھواں دار بیٹنگ کی بدولت ناٹنگھم شائر نے بالآخر یہ میچ 166 رنز سے جیتا۔ یاد رہے کہ نیش کوئی "گرے پڑے" یا پارٹ ٹائم بالر نہیں تھے بلکہ انہوں نے اپنے 17 سالہ کیریئر میں 25.87 کی اوسط سے 993 فرسٹ کلاس جبکہ 21.26 کی اوسط سے 325 لسٹ اے وکٹ لیے۔

نوٹ: سوبرز کی کریز پر موجودگی کے دوران سکور میں 86 رنز کا اضافہ ہوا جس میں سے 76 سوبرز نے بنائے تھے۔

اثر انگیزی:

سوبرز وہ کھلاڑی تھے جو بجلی کی مانند ایک لمحے میں کھیل کا پانسا پلٹ دیتے تھے۔ اب چاہے وہ ایک اسپیل ہو، ایک اننگ ہو یا کوئی کیچ۔ ان کے ساتھی کھلاڑیوں کو ہمیشہ یہ یقین رہتا تھا کہ جب تک سوبرز میدان میں موجود ہیں تو کسی بھی لمحے کوئی غیر معمولی واقعہ رونما ہو سکتا ہے۔

سوبرز نے ایسے زمانے میں دنیائے کرکٹ کو فتح کیا جب ہیلمٹ نہیں تھے، بارش کی صورت میں پچوں کا ڈھانپنے کا رواج نہ تھا، اور ویسٹ انڈیز نے ابھی "کالی آندھی" بن کر دنیائے کرکٹ کو تاراج نہیں کیا تھا۔ انہوں نے انگلینڈ کے خلاف، خصوصاً اس کی اپنی سرزمین پر، غیر معمولی کامیابیاں حاصل کیں، بطور بلے باز بھی اور بطور بالر بھی۔ انگلینڈ کے خلاف ان کے 3000 سے زائد رنز اور سو سے زائد وکٹیں ان کے آل راؤنڈ عروج کی ٹھوس دلیل ہیں۔ یاد رہے کہ اب تک صرف 9 بلے باز ہی کسی ایک مخالف کے خلاف 3000+ رنز بنا سکے ہیں جن میں سے صرف سوبرز ہی واحد آل راؤنڈر ہیں، نیز کسی ایک ملک کے خلاف 100+ وکٹیں لینے والے 45 بالرز میں سوبرز کے علاوہ محض 6 آل راؤنڈرز ہی شامل ہیں۔ (جورج گفن، مونٹی نوبل، ولفریڈ رہوڈز، ایان بوتھم، رچرڈ ہیڈلی اور روی چندرن ایشون)، کپل دیو پاکستان کے خلاف 1 وکٹ کی کمی سے جبکہ عمران خان انڈیا کے خلاف 6 وکٹ کی کمی سے اس فہرست میں شامل نہ ہو سکے۔

31 فتوحات کا حصہ رہنے والے سوبرز نے 77.42 کی اوسط سے 3097 رنز سکور کیے جس میں 12 سنچریاں شامل تھیں، *365 ان کا بہترین سکور رہا۔ جبکہ بالنگ میں انہوں نے 24.04 کی عمدہ اوسط سے 104 وکٹ لیے، 6/73 انکی بہترین بالنگ رہی۔ فیلڈ میں 58 کیچ اسکے علاوہ تھے۔ انکی بیٹنگ اور بالنگ اوسط کے درمیان فرق 53.37 رہا۔

ان کے زمانے میں ایک روزہ کرکٹ تو نہ تھی ہاں کاؤنٹی کرکٹ جہاں نہ صرف انگلینڈ کے بہترین کھلاڑی کھیلا کرتے بلکہ دنیا بھر سے اعلیٰ ترین کھلاڑی بھی شامل ہوتے تھے، انکی کارکردگی ہمیشہ لاجواب رہی۔ وہ آسٹریلیا میں شیفیلڈ شیلڈ کرکٹ بھی کھیلے اور ناقابلِ یقین کامیابیاں سمیٹیں۔ بطور آل راؤنڈر انہوں نے 7 مرتبہ ایک سیزن میں 1000+ رنز بنانے کے ساتھ ساتھ 50+ وکٹ بھی لیے۔ 28 اگست 1974ء کو اپنے آخری فرسٹ کلاس میچ میں بھی انہوں نے *132 اور 77 کی اننگ کھیلیں۔ سوبرز نے 383 فرسٹ کلاس میچوں میں 28314 رنز سکور کیے جس میں 86 سنچریاں شامل تھیں، یعنی ٹیسٹ کرکٹ کے علاوہ بھی 20282 رنز سکور کیے، بشمول 60 سنچریوں کے۔ بالنگ میں تو انکی کارکردگی اور بہتر ہو جاتی ہے کیونکہ انہوں نے 383 فرسٹ کلاس میچوں میں 1043 وکٹ محض 27.74 کی اوسط سے حاصل کیے۔ یعنی ٹیسٹ میچوں کے علاوہ دیگر 290 فرسٹ کلاس میچوں میں 25.91 کی اوسط سے 808 وکٹ۔

گمشدہ اعدادوشمار: جب 1970ء میں جنوبی افریقہ پر نسل پرستانہ پالیسیوں کی وجہ سے بین الاقوامی کھیلوں میں حصہ لینے کی پابندی لگی تو انگلینڈ اور آسٹریلوی بورڈ سخت مشکل میں پڑ گئے۔ دراصل اگلے سال بھر میں جنوبی افریقہ نے دونوں ممالک کا دورہ کرنا تھا جس کے لیے سبھی انتظامات مکمل تھے۔ چونکہ اتنے کم وقت میں کسی دوسری ٹیم کو بلانا ممکن نہ تھا اس لیے ایک "ریسٹ آف دی ورلڈ" الیون تشکیل دی گئی جس میں جنوبی افریقہ کے نمایاں کھلاڑیوں سمیت پاکستان، انڈیا اور ویسٹ انڈیز سے بھی کھلاڑی شامل تھے۔ ظاہر ہے کہ ایسی عالمی الیون کی قیادت کے لیے سوبرز سے بہتر اور کون ہو سکتا تھا؟ اس وقت ان میچوں کو ٹیسٹ میچ ہی کہا گیا لیکن بعد میں ان سے یہ درجہ واپس لے لیا گیا۔

1970ء میں انگلینڈ کے خلاف سیریز میں سوبرز بیٹنگ اور بالنگ، دونوں میں نمایاں ترین کھلاڑی ثابت ہوئے۔ 5 میچوں کی 9 اننگ میں 1 مرتبہ ناٹ آؤٹ رہتے ہوئے انہوں نے 73.5 کی اوسط سے 588 رنز بنائے، بشمول 2 سنچریوں اور 3 نصف سنچریوں کے، 183 ان کا بہترین سکور رہا۔ بالنگ میں انہوں نے 21.52 کی اوسط سے 21 وکٹ لیے ،بشمول 1 مرتبہ اننگ میں 5 وکٹ کے، 6/21 انکی بہترین بالنگ رہی۔

اگلے سال آسٹریلیا کے خلاف اگرچہ ڈینس للی نے انہیں بہت پریشان کیا لیکن میلبرن پر انہوں نے 254 رنز کی وہ یادگار اننگ کھیلی جسے ڈان بریڈمین نے بھی "آسٹریلوی سرزمین پر کھیلی گئی بہترین اننگ" قرار دیا. آسٹریلیا کے خلاف انہوں نے 9 اننگ میں 2 مرتبہ ناٹ آؤٹ رہتے ہوئے 48.71 کی اوسط سے 341 رنز بنائے بشمول ایک ڈبل سنچری کے۔بالنگ میں انہوں نے 48.33 کی اوسط سے 9 وکٹ لیے۔

ان 10 میچوں کی 18 اننگ میں انہوں نے 61.93 کی اوسط سے 929 رنز بنائے اور 29.56 کی اوسط سے 30 وکٹ لیے۔ اگر ان میچوں سے ٹیسٹ کا رتبہ نہ چھینا جاتا تو ان کے مجموعی رنز کی تعداد 58.18 کی اوسط سے 8961 (29 سنچریاں) اور وکٹوں کی تعداد 33.52 کی اوسط سے 265 ہوتی، بشمول 7 مرتبہ اننگ میں 5 وکٹ کے جبکہ انکی بہترین بالنگ 6/21 ہوتی۔

والٹر لارنس ٹرافی: یہ ٹرافی ہر سال انگلینڈ میں تیز ترین سنچری بنانے والے بلے باز کو دی جاتی ہے۔ سوبرز نے 1974ء میں جب وہ اپنے کیریئر کے اختتام پر تھے، ناٹنگھم شائر کی جانب سے ڈربی شائر کے خلاف اِلکسٹن پر محض 83 منٹ میں سنچری مکمل کرکے یہ ٹرافی اپنے نام کی۔

نوٹ: اسکے بعد وہ صرف 5 فرسٹ کلاس میچ ہی کھیلے۔

اعزازات: 1964ء میں انہیں وزڈن کے پانچ بہترین کھلاڑیوں میں شامل کیا گیا جبکہ 1970ء میں وہ انگلش کاؤنٹی کرکٹ کے بہترین آل راؤنڈر قرار پائے، 2000ء میں وزڈن کی جانب سے انہیں صدی کا بہترین کرکٹر قرار دیا گیا۔

ریٹائرمنٹ کے بعد:

کرکٹ سے باضابطہ ریٹائرمنٹ کے بعد بھی سر گیری سوبرز کا کھیل سے تعلق ٹوٹا نہیں۔ انہوں نے کوچنگ کے میدان میں قدم رکھا اور ویسٹ انڈیز کے نوجوان کھلاڑیوں کی رہنمائی کی۔ ان کی خدمات کے اعتراف میں ملکہ برطانیہ نے انہیں 1975ء میں 'نائٹ' کا خطاب دیا، جس کے بعد سے انہیں "سر گیری" کے نام سے پکارا جاتا ہے۔ وہ طویل عرصے تک کرکٹ کے سفیر کے طور پر دنیا بھر میں سرگرم رہے اور مختلف ممالک میں کرکٹ کو فروغ دینے میں کلیدی کردار ادا کیا۔

بہترین دوست کی المناک موت:

گیری سوبرز کی زندگی کا ایک تاریک پہلو وہ المیہ ہے جس نے نہ صرف کرکٹ کے کھیل سے ایک ابھرتے ہوئے عظیم آل راؤنڈر کو چھین لیا، بلکہ سوبرز کی اپنی شخصیت کو بھی بدل کر رکھ دیا۔ یہ بات کم ہی لوگ جانتے ہیں کہ اگر 1959ء میں ایک غیر متوقع حادثہ پیش نہ آتا تو اس زمانے میں ویسٹ انڈیز کے پاس بیک وقت دو عظیم آل راؤنڈر ہوتے۔ ان میں سے ایک تو سر گیری سوبرز خود تھے اور دوسرے ان کے قریبی دوست، اونیل "کولی" سمتھ۔

کولی سمتھ نے 1955ء میں اپنے ٹیسٹ کیریئر کے آغاز سے ہی انگلینڈ اور انڈیا جیسی مضبوط ٹیموں کے خلاف اپنی بیٹنگ اور آف سپن بولنگ سے کرکٹ کے ایوانوں میں ہلچل مچا دی تھی۔ 1959ء میں انڈیا کے خلاف دہلی ٹیسٹ میں 100 رنز اور 8 وکٹوں کی کارکردگی ہو یا لنکاشائر لیگ میں 306 رنز کی اننگ، سمتھ کامیابیوں پر کامیابیاں حاصل کرتے جا رہے تھے۔ 7 ستمبر 1959ء کی صبح، گیری سوبرز اپنے ساتھیوں، کولی سمتھ اور ٹام ڈیوڈنی کے ہمراہ لندن ایک چیرٹی میچ میں شرکت کے لیے کار میں جا رہے تھے کہ صبح کے 4 بج کر 45 منٹ پر وہ حادثہ پیش آیا جس نے سب کچھ بدل دیا۔ سوبرز کار چلا رہے تھے کہ یکایک کار ایک جانور لے جانے والے ٹرک سے جا ٹکرائی۔ سمتھ اس وقت پچھلی سیٹ پر سو رہے تھے،حادثے کے نتیجے میں ان کا سر زور سے اگلی سیٹ سے ٹکرایا۔ ابتدائی طور پر سمتھ بظاہر ٹھیک لگ رہے تھے اور الٹا سوبرز سے ڈیوڈنی کی فکر کرنے کو کہہ رہے تھے، مگر سر اور ریڑھ کی ہڈی میں پہنچنے والی گہری چوٹ نے انہیں کوما میں پہنچا دیا، جہاں تین دن بعد وہ خالقِ حقیقی سے جا ملے۔ جمیکا میں ان کے جنازے میں ساٹھ ہزار سے زائد افراد کا امڈ آنا اس بات کا ثبوت تھا کہ وہ کتنے ہر دلعزیز تھے۔ آج بھی ان کے آبائی قصبے، ٹرینچ ٹاؤن کی ایک سڑک ان کے نام سے منسوب ہے۔

اس حادثے نے ساری زندگی سر گیری سوبرز کو شدید ذہنی کرب میں مبتلا رکھا۔ ایک تو جگری دوست کو کھونے کا دکھ اور دوسرا یہ احساس کہ گاڑی وہ خود چلا رہے تھے۔ اسی واقعے کے بعد چونکہ وہ زندگی کی بے ثباتی کو بہت قریب سے دیکھ چکے تھے چنانچہ ان کے اندر زندگی کو "لمحہ موجود میں جینے" کا احساس پیدا ہوا جس نے انہیں شراب اور جوئے کی طرف مائل کر دیا۔

ذاتی زندگی:

سر گیری سوبرز کی نجی زندگی کے بارے میں کہا جا سکتا ہے کہ وہ "بابر بہ عیش کوش کہ عالم دوبارہ نیست" کے عملی پیکر تھے۔ وہ جہاں میدان میں اپنے مخالفین کو آندھی طوفان کی طرح اڑا دیا کرتے تھے تھے، میدان سے باہر بھی زندگی کو اسی بھرپور اور آزادانہ انداز میں جینے کے قائل تھے۔

انہیں موسیقی، پارٹیوں اور لوگوں میں گھلنے ملنے کا بہت شوق تھا اور انہیں زندگی کی رعنائیوں پر کوئی پابندی عائد کرنے کی عادت نہیں تھی۔گویا بقول فیض:

آئے کچھ ابر، کچھ شراب آئے

پھر اس کے بعد آئے جو عذاب آئے

ان کی نجی زندگی میں بھی کرکٹ کی طرح دلچسپ اتار چڑھاؤ رہے۔ 1966/67ء میں جب ویسٹ انڈیز کی ٹیم ہندوستان کے دورے پر تھی، تو سوبرز کی منگنی معروف انڈین اداکارہ انجو مہندرو سے ہوئی تھی، لیکن ملک چھوڑنے کے بعد یہ رشتہ زیادہ دیر نہ چل سکا۔ 1969ء میں انہوں نے انگلینڈ میں ایک آسٹریلوی نژاد خاتون پروُڈنس کربی (Prudence Kirby) سے شادی کی۔ سوبرز اپنی اہلیہ کے ساتھ کچھ عرصہ آسٹریلیا میں بھی مقیم رہے، تاہم 1984ء میں ان کے درمیان علیحدگی ہو گئی اور 1990ء میں ان کی طلاق ہو گئی۔ اس کے بعد سر گیری سوبرز واپس اپنے وطن بارباڈوس منتقل ہو گئے۔ان کی اولاد میں تین بچے شامل ہیں: میتھیو، ڈینیئل اور جینی وِیو۔

حرفِ آخر:

وہ جو شاد عظیم آبادی نے کہا تھا نا کہ:

ڈھونڈو گے اگر ملکوں ملکوں

ملنے کے نہیں، نایاب ہیں ہم

تو بس سوبرز وہی نادر و نایاب کرشمہ تھے جو صدیوں میں کہیںں ایک آدھ بار رونما ہوتا ہے۔ ان کی شخصیت میں ایک خاص قسم کا سکون اور ٹھہراؤ تھا جو انہیں میدان کے باہر بھی ایک پرکشش انسان بناتا تھا۔ اگرچہ وہ شہرت کی بلندیوں پر رہے لیکن ان کی منکسر المزاجی اور دوسروں کی مدد کرنے کا جذبہ انہیں آج بھی رول ماڈل بناتا ہے۔ ان کی آپ بیتی اور ان پر لکھی گئی دیگر کتابیں اس بات کی گواہی دیتی ہیں کہ ایک انسان کے طور پر ان کا کردار بھی ان کے کھیل کی طرح ہی شاندار رہا ہے۔ سچ تو یہ ہے کہ اگر کرکٹ کی تاریخ سے صرف ایک ایسا کھلاڑی منتخب کرنا ہو جو کھیل کے ہر شعبے کی بخوبی نمائندگی کرے، تو دنیا کے بیشتر کرکٹ مؤرخین ایک ہی نام پر متفق ہوں گے... سر گیری سوبرز۔

تحریر و تحقیق: محسن وقار علی
محسن وقار علی معروف اسپورٹس کالم نگار اور تجزیہ کار ہیں، جو قومی و بین الاقوامی کھیلوں، بالخصوص کرکٹ، پر گہری نظر رکھتے ہیں۔ وہ کھیلوں کے اہم واقعات، کھلاڑیوں کی کارکردگی اور بدلتے رجحانات پر تحقیق اور حقائق کی بنیاد پر تجزیاتی کالم تحریر کرتے ہیں۔ان کی تحریریں متوازن رائے، مستند معلومات اور مؤثر اندازِ بیان کی عکاس ہیں۔