ہیلو مراکو فینز!

کل یعنی منگل 30 جون کی صبح 6 بجے اطلس لائینز اِن ایکشن ہوں گے۔ یہ ایک زبردست مقابلہ ہونے جا رہا ہے۔ نیدرلینڈز ایک مضبوط ٹیم ہے، مگر اطلس لائنز بھی شاندار فارم میں ہیں۔ ان شاء اللہ ایک بار پھر تاریخ رقم ہوگی۔ اطلس پہاڑوں کے شیروں نے 2022 میں اسپین اور پرتگال جیسی مضبوط ٹیموں کو دھول چٹائی تھی، تو نیدرلینڈز کو بھی گھر بھیجنے کی بھرپور صلاحیت رکھتے ہیں۔

اس دوران ایک دلچسپ بات بھی بتاتا چلوں۔ یواخم کلیمنٹ یک جرمن ریاضی دان ہیں۔ انہوں نے سائنسی بنیادوں پر ایک ماڈل تیار کیا ہے، جس کے ذریعے وہ فیفا ورلڈ کپ کے فاتح کی پیش گوئی کرتے ہیں۔ اس بار فیفا ورلڈ کپ 2026 کے لیے انہوں نے نیدرلینڈز کو چیمپئن قرار دیا ہے۔ مزید حیرت انگیز بات یہ ہے کہ ان کی 2014، 2018 اور 2022 کی پیش گوئیاں درست ثابت ہو چکی ہیں۔ تاہم، ان شاء اللہ اس بار مراکش ان کی یہ پیش گوئی ناک آؤٹ مرحلے ہی میں غلط ثابت کر دے گا۔

نیدرلینڈز کا پورا کھیل ٹیکٹیکل اٹیک کے گرد گھومتا ہے۔ ان کے پاس دنیا کے بہترین سینٹرل ڈیفینڈرز میں شمار ہونے والے کھلاڑی موجود ہیں۔ لیورپول کے ورجل وان ڈائک، جو نیدرلینڈز کے کپتان بھی ہیں، مانچسٹر سٹی کے ناتھن آکے، مکی وان ڈی وین اور ژاں پال فان ہیکے جیسے کھلاڑی ڈچ دفاع کی جان ہیں۔ جبکہ اسٹرائیکر برائن بروبی بہترین فارم میں ہیں اور اب تک تین گول کر چکے ہیں۔ اس کے علاوہ کوڈی گاکپو اور کریسینسیو سمرول بھی عمدہ ردھم میں ہیں، جو اپنی رفتار اور مہارت سے مخالف ٹیم پر مسلسل دباؤ ڈالتے ہیں۔

جس طرح جاپان نے ابتدا میں مضبوط دفاعی حکمتِ عملی اور نظم و ضبط کے ذریعے ڈچ اسٹرائیکرز کو قابو میں رکھا اور پہلے ہاف میں نیدرلینڈز کو زیادہ اسپیس نہیں دی، اسی طرح مڈفیلڈ اور دفاع کے درمیان فاصلہ بھی انتہائی کم رکھا، جس کے باعث فرینکی ڈی یونگ اور ریان گراوینبرخ کے پاسز فرنٹ لائن تک پہنچنا مشکل ہوگیا تھا۔ بعدازاں دوسرے ہاف میں جب اورنج آرمی نے جاپانی گول پر بھرپور حملے کیے تو جاپان نے مؤثر کاؤنٹر اٹیکس کے ذریعے میچ برابر کر لیا۔

مراکش کے پاس تو جاپان سے بھی زیادہ مضبوط دفاع موجود ہے، جبکہ اشرف حکیمی اور براہیم ڈیاز جیسے تیز رفتار کھلاڑی بھی ہیں۔ نیدرلینڈز کا زیادہ تر کھیل فرینکی ڈی یونگ کے پاسز پر استوار ہوتا ہے، اس لیے صوفیان امرابط کو ان کے ساتھ سائے کی طرح چپکے رہنا ہوگا تاکہ وہ برائن بروبی اور کوڈی گاکپو تک گیند نہ پہنچا سکیں۔ ایوب بوعدی کا کردار بھی نہایت اہم ہوگا۔ مراکش کو کھیل کو مڈفیلڈ ہی میں روکنا ہوگا۔ دوسری جانب اشرف حکیمی، براہیم ڈیاز اور اسماعیل صبیری اپنی رفتار سے فائدہ اٹھاتے ہوئے کاؤنٹر اٹیکس کے ذریعے نیدرلینڈز کے ونگز کو نشانہ بنا کر برتری حاصل کر سکتے ہیں۔

اگر میچ 120 منٹ تک برابر بھی رہتا ہے تو جیت کے امکانات مراکش کے حق میں ہو سکتے ہیں، کیونکہ گزشتہ ورلڈ کپ کی طرح اس کے پاس ایک مضبوط دفاع موجود ہے۔ اور اگر مقابلہ پنالٹی شوٹ آؤٹ تک گیا تو مراکش کے پاس چٹان جیسے گول کیپر یاسین بونو موجود ہیں، جبکہ نیدرلینڈز نسبتاً پنالٹی شوٹ آؤٹس میں کمزور سمجھا جاتا ہے۔

فٹ بال پنڈت اس میچ کو راؤنڈ آف 32 کا دلچسپ ترین مقابلہ قرار دے رہے ہیں۔ امیدِ قوی ہے کہ اطلس لائنز ایک بار پھر دھاڑیں گے اور ڈچ اورنج آرمی کا سفر یہیں تمام کر دیں گے۔ ان شاء اللہ

عاش المغرب

محمد ثقلین کانجن