گونزالو پلاتا 🇪🇨

ایکواڈور ورلڈ کپ کے اپنے ابتدائی میچوں میں آئیوری کوسٹ کے خلاف کوئی گول کر سکی اور نہ ہی پہلی بار عالمی کپ کھیلنے والی ٹیم کیوراساؤ کے خلاف گیند کو جال کی راہ دکھا سکی۔ لیکن جب ان کا سامنا ٹورنامنٹ کی مضبوط ترین ٹیموں میں سے ایک، جرمنی سے ہوا، تو انہوں نے دو گول داغ کر نہ صرف اگلے راؤنڈ کے لیے کوالیفائی کر لیا بلکہ فٹ بال کی تاریخ میں اپنا نام سنہرے حروف سے درج کروا لیا۔

ایکواڈور کو اپنے پہلے میچ میں آئیوری کوسٹ کے ہاتھوں شکست کا سامنا کرنا پڑا تھا جبکہ دوسرا مقابلہ کیوراساؤ کے خلاف بغیر کسی گول کے برابر رہا۔ یوں ابتدائی دو میچوں میں ایک بھی گول نہ کرنے کی وجہ سے ان کے پاس صرف ایک پوائنٹ تھا۔ راؤنڈ آف 32 میں جگہ پکی کرنے کے لیے انہیں جرمنی کے خلاف ہر حال میں فتح درکار تھی۔ میچ کے آغاز میں ہی جرمنی نے پہلا گول کر کے برتری حاصل کر لی، جس سے یوں لگا جیسے ایکواڈور کی امیدوں کا محل زمین بوس ہو گیا ہے۔ لیکن ایکواڈور نے شاندار واپسی کرتے ہوئے مضبوط جرمنی کو 2-1 سے دھول چٹائی اور اگلے مرحلے کا ٹکٹ کٹا لیا۔

اس یادگار مقابلے کے اصل ہیرو گونزالو پلاتا بنے، جنہوں نے ایکواڈور کے شہر گویاکیل کی ایک غریب بستی میں آنکھ کھولی تھی اور اپنا بچپن سڑکوں پر فٹ بال کھیل کر گزارا تھا۔ بعد میں انہوں نے اپنے ملک کے مختلف کلبز سے کھیل کا آغاز کیا۔ جس کے بعد یورپ کے کئی کلبز کا حصہ بھی رہے۔ یہ قطر کے کلب السد کی نمائندگی بھی کر چکے ہیں، مگر آج کل یہ برازیل کے نامور کلب فلیمینگو کے لیے کھیل رہے ہیں۔

جرمنی کے خلاف یہ معرکہ ان کے کیریئر کا سب سے یادگار میچ بن گیا۔ 77 ویں منٹ میں، جب ایکواڈور کو اگلے مرحلے میں جانے کے لیے گول کی سخت ضرورت تھی، پلاتا نے اعصاب شکن دباؤ کے باوجود ایک جادوئی گول داغ دیا۔ ان کے اس ایک گول نے چار بار کی عالمی چیمپئن جرمنی کو گھٹنے ٹیکنے پر مجبور کر دیا۔ اس تاریخی اور سنسنی خیز فتح کی بدولت ایکواڈور نے 2006ء کے بعد پہلی بار ورلڈ کپ کے ناک آؤٹ مرحلے کے لیے کوالیفائی کیا ہے، اور گونزالو پلاتا راتوں رات اپنی قوم کے نئے سپر ہیرو بن کر ابھرے ہیں۔

ایکواڈور کے ساتھ اب تک بوسنیا اینڈ ہرزیگووینا اور سویڈن وہ تیسرے نمبر کی ٹیمیں ہیں جنہوں نے باضابطہ طور پر راؤنڈ آف 32 کے لیے کوالیفائی کر لیا ہے۔ جبکہ کل آٹھ تیسرے نمبر والی ٹیموں نے اگلے مرحلے کےلئے منتخب ہونا ہے۔ بہرحال یہ اس ٹورنامنٹ ایک بڑا اپ سیٹ تھا۔ اس جیت پر ایکواڈور کے کھلاڑی داد کے مستحق ہیں۔ جبکہ پلاتا کو اکیس توپوں کی سلامی ۔۔۔۔

تحریر:محمد ثقلین کانجن