تحریر:محمد ثقلین کانجن
فیفا عالمی کپ میں ٹاپ فائیو مسلم ممالک کی ٹیمیں

فیفا عالمی کپ 2026ء کئی لحاظ سے منفرد اور دلچسپ ہے۔ ایک دلچسپی کی وجہ پہلی بار کثیر تعداد میں مسلم ممالک کی ٹیموں کا حصہ لینا بھی ہے۔ میرے خیال میں ٹاپ فائیو مسلم ممالک کی ٹیموں میں بالترتیب مراکش، ترکیہ، مصر، سینیگال اور ایران ہیں۔

1. مراکش

مراکش گروپ سی میں برازیل، اسکاٹ لینڈ اور ہیٹی کے ساتھ ہے۔ ٹیم کا بنیادی انحصار ان کے اسٹار رائٹ بیک اشرف حکیمی، مڈفیلڈر سفیان امرابط، گول کیپر یاسین بونو اور نوجوان کھلاڑی براہیم ڈیاز پر ہے۔ پچھلے ورلڈ کپ کی سیمی فائنلسٹ مراکش اس بار بھی سب سے مضبوط مسلم ٹیم کے طور پر ابھری ہے۔ کوالیفائنگ راؤنڈز میں شاندار کارکردگی کے بعد ماہرین انہیں گروپ اسٹیج سے آگے جانے کے لیے فیورٹ قرار دے رہے ہیں۔

2. ترکیہ

ترکیہ کی ٹیم 24 سال کے طویل انتظار کے بعد فیفا عالمی کپ میں واپس آئی ہے۔ یہ ٹیم نوجوان ٹیلنٹ اور تجربہ کار کھلاڑیوں کا بہترین امتزاج ہے۔ ریال میڈرڈ کلب کے مایہ ناز نوجوان اٹیکنگ مڈفیلڈر اردا گولر ٹیم کے لیے ریڑھ کی ہڈی ہیں۔ اس کے علاوہ مڈفیلڈر کپتان ہاکان چالہانوگلو اور کینان یلدز بھی ٹیم کے لیے اہم کردار ادا کر سکتے ہیں۔

ترکیہ کا یہ اسکواڈ تاریخ کے مضبوط ترین اسکواڈز میں سے ایک مانا جا رہا ہے۔ اگر یہ ٹیم اپنی حالیہ فارم برقرار رکھتی ہے تو گروپ اسٹیج سے باآسانی آگے نکل کر ناک آؤٹ مرحلے (راؤنڈ آف 16 یا کوارٹر فائنل) تک رسائی حاصل کر سکتی ہے۔

3. مصر

مصر کی ٹیم گروپ G کا حصہ ہے۔ اس گروپ میں ان کے ساتھ بیلجیم، ایران اور نیوزی لینڈ شامل ہیں۔ روایتی طور پر مصر اپنے مضبوط دفاعی کھیل کی وجہ سے مشہور ہے اور یہی ان کی طاقت ہے۔ ٹیم کا انحصار لیورپول کے مایہ ناز فارورڈ محمد صلاح پر ہو گا، جو انفرادی کارکردگی سے بھی ٹیم کو جتوانے کی قوت رکھتا ہے۔ اس کے ساتھ مانچسٹر سٹی کے اِن فارم فارورڈ عمر مرموش اور محمود تریزیگے پر بھی انحصار ہو گا۔ اس گروپ میں بیلجیم کے بعد اگلے مرحلے کے لیے مقابلہ مصر اور ایران کے درمیان ہو گا۔

4. سینیگال

فرانس، ناروے، عراق اور سینیگال گروپ آئی میں ہیں۔ سینیگال ٹیم کا پورا انحصار ان کے تجربہ کار فارورڈ سادیو مانے، الهلال کے تجربہ کار سینٹر بیک کالیدو کولیبالی، فارورڈ لائن میں نکولس جیکسن اور اسمائیلا سار، جبکہ مڈفیلڈ میں لامین کامارا پر ہو گا۔

افریقی چیمپئن سینیگال اپنے جسمانی کھیل اور تیز رفتار کاؤنٹر اٹیک کے لیے جانی جاتی ہے۔ گروپ I میں فرانس کو فیورٹ مانا جا رہا ہے، لیکن سینیگال اور ناروے کے درمیان دوسرے نمبر کے لیے کڑا مقابلہ ہو گا۔ اگر یہ ٹیم فرانس یا ناروے سے پوائنٹس چھیننے میں کامیاب رہتی ہے تو وہ باآسانی راؤنڈ آف 32 (ناک آؤٹ مرحلے) کے لیے کوالیفائی کر جائے گی۔

5. ایران

فیفا عالمی کپ 2026ء میں سب سے پہلے کوالیفائی کرنے والی ٹیم ایران گروپ G میں شامل ہے، جہاں ان کا مقابلہ بیلجیم، مصر اور نیوزی لینڈ سے ہو گا۔ ٹیم کا 90 فیصد انحصار ان کی اسٹار فارورڈ جوڑی مہدی طارمی اور سردار آزمون پر ہے۔ ایران ایشیا کی مضبوط ترین ٹیموں میں سے ایک ہے جس نے شاندار انداز میں کوالیفائی کیا۔ ان کا اسکواڈ انتہائی تجربہ کار ہے اور وہ مصر اور نیوزی لینڈ کو پچھاڑ کر اگلے راؤنڈ میں جگہ بنانے کے لیے پرامید ہیں۔ ایران کے میچز کو ہائی رسک قرار دیا گیا ہے۔ کھلاڑیوں پر امریکہ۔ایران کشیدگی کے بھی اثرات ہوں گے، تاہم ٹیم اگلے مرحلے کے لیے کوالیفائی کرنے کی پوری صلاحیت رکھتی ہے۔

اس کے علاوہ مسلم ممالک میں سعودیہ، قطر، اردن، الجزائر اور تیونس کی ٹیمیں بھی عمدہ کارکردگی دکھانے کی پوری صلاحیت رکھتی ہیں۔

کالم نگار کا تعارف:
محمد ثقلین کانجن ایک مصنف، تجزیہ کار اور محقق ہیں، جنہوں نے بین الاقوامی تعلقات اور انگریزی ادب میں ماسٹرز کی ڈگری حاصل کر رکھی ہے۔ وہ گزشتہ دس برس سے زائد عرصے سے اردو اور انگریزی دونوں زبانوں میں مختلف موضوعات پر لکھ رہے ہیں۔

ان کی تحریروں کا دائرہ بین الاقوامی امور، سماجی مسائل، ادب، کھیل اور حالاتِ حاضرہ سمیت متعدد شعبوں پر محیط ہے۔ وہ اپنی تحریروں میں گہری تحقیق، متوازن تجزیے اور مؤثر اندازِ بیان کو یکجا کرتے ہیں، جس کے ذریعے قارئین کو عصری مسائل اور عالمی پیش رفت کے بارے میں واضح، جامع اور بصیرت افروز نقطۂ نظر فراہم کرتے ہیں۔