فیفا عالمی کپ 2026ء میں کون سی ٹیم چیمپیئن بنے گی، یہ امر غیر متوقع اور غیر یقینی صورتِ حال لیے ہوئے ہے۔ کاغذ پر فرانس، اسپین اور ارجنٹائن کے درمیان تگڑا مقابلہ نظر آتا ہے، مگر برازیل، جرمنی، پرتگال اور انگلینڈ بھی سرپرائز دینے اور چیمپیئن بننے کی پوری صلاحیت رکھتے ہیں۔ ان ٹیموں کے مضبوط اور کمزور پہلوؤں پر طائرانہ نظر ڈالتے ہیں۔

1۔ فرانس

مضبوط پہلو:

2018ء کی فاتح اور 2022ء کی رنر اپ فرانس 2026ء کے عالمی کپ میں بھی مضبوط دعوے داروں میں شامل ہے۔ فرانس کے ہیڈ کوچ دیدیے دیشام نے تجربے اور ٹیلنٹ کے امتزاج سے ٹیم ترتیب دی ہے۔ فرانس کا سب سے بڑا ہتھیار کیلیان ایمباپے اور عثمان ڈیمبیلے کی بجلی جیسی تیز رفتاری ہے۔ فرانسیسی مڈفیلڈر کانتے، کونے اور چوامینی کھیل کو تیزی سے آگے بڑھانے میں ماہر ہیں۔ اس کے ساتھ تھیو ہرنانڈیز، ولیم سالیبا، مائیکل اولیسے اور گول کیپر مائیک مینیان بھی میچ کا پانسہ چند سیکنڈ میں پلٹنے کی صلاحیت رکھتے ہیں۔

کمزور پہلو:

اہم میچوں میں ہیڈ کوچ دیشام بعض اوقات بہت زیادہ دفاعی انداز اختیار کر لیتے ہیں۔ فرانس اوپن پلے میں بہت مضبوط ہے، لیکن اکثر کارنرز اور فری ککس کے دفاع میں ان کا توازن بگڑ جاتا ہے۔ یہی وہ موقع ہوتا ہے جب بڑی ٹیمیں انہیں جکڑ سکتی ہیں۔

2۔ اسپین

یورو 2024ء کی چیمپیئن اسپین کے پاس اس وقت دنیا کے سب سے زیادہ تکنیکی اور متوازن اسکواڈز میں سے ایک موجود ہے۔ ہیڈ کوچ لوئس ڈی لا فوئنٹے کی زیرِ نگرانی یہ ٹیم اپنے عروج پر ہے۔

مضبوط پہلو:

یورو کپ کی حالیہ جیت سے ٹیم کے حوصلے بلند ہیں۔ روڈری، لامین یامال، نیکو ولیمز اور پیڈری جیسے کھلاڑی ٹیم کی جان ہیں۔ پوری ٹیم کا انحصار ونگرز کے عمدہ کھیل پر ہوگا۔

کمزور پہلو:

اگر مخالف ٹیم ان کے ونگرز کو روک لیتی ہے تو اسٹرائیکر کی کمی اور نسبتاً کمزور دفاع اسپین کے لیے مشکلات کھڑی کر سکتا ہے۔

3۔ ارجنٹائن

مضبوط پہلو:

دفاعی چیمپیئن ارجنٹائن لیونل میسی کی قیادت میں ایک مضبوط سائیڈ ہے۔ دلچسپ بات یہ ہے کہ ٹیم میں اکثریت ان کھلاڑیوں کی ہے جو پچھلا فیفا عالمی کپ جیتنے والی ٹیم کا حصہ تھے۔ اس بار بھی مارٹینیز، آلواریز اور گول کیپر ایمیلیانو مارٹینیز پر ٹیم کا بڑا انحصار ہے۔

کمزور پہلو:

ارجنٹائن کے دفاع میں انجریز ایک تشویش رہی ہیں۔ ٹیم کے اہم سینٹر بیک کرسٹیان رومرو مختلف مواقع پر فٹنس مسائل سے دوچار رہے ہیں، جبکہ لیونارڈو بالیردی بھی انجری کے باعث اسکواڈ سے باہر رہے ہیں۔ ایسی صورتِ حال دفاعی استحکام کو متاثر کر سکتی ہے۔

4۔ برازیل

مضبوط پہلو:

روایتی طور پر امریکہ میں ہونے والے فیفا عالمی کپوں میں برازیل کی کارکردگی اچھی رہی ہے۔ کپتان مارکینیوس، نیمار، وینیسیئس جونیئر، گول کیپر ایلیسن بیکر، مڈفیلڈر کاسمیرو اور پاکیتا جیسے عالمی معیار کے کھلاڑی انفرادی طور پر میچ کا پانسہ پلٹنے کی صلاحیت رکھتے ہیں۔

کمزور پہلو:

حالیہ کوالیفائرز میں غیر مستقل مزاجی اور مڈفیلڈ میں کھیل کو کنٹرول کرنے والے کھلاڑی کی کمی کی وجہ سے ٹیم مشکلات سے دوچار ہو سکتی ہے۔

5۔ جرمنی

مضبوط پہلو:

جرمنی کے پاس تجربہ کار اور نوجوان کھلاڑیوں کا متوازن امتزاج موجود ہے۔ یہ ٹیم ہوم گراؤنڈز سے باہر بھی بہترین ٹیکٹیکل ڈسپلن کی وجہ سے مشہور ہے۔ گول کیپر مانوئل نوئیر، یوشوا کِمِش، کائی ہاورٹز، فلورین وِرتس اور جمال موسیالا جیسے شاندار کھلاڑی ٹیم کی ناؤ پار لگا سکتے ہیں۔ موسیالا اور وِرتس کی جوڑی مخالف ٹیم کے لیے خطرناک ثابت ہو سکتی ہے۔

کمزور پہلو:

گزشتہ چند عالمی کپوں میں مایوس کن کارکردگی کا نفسیاتی دباؤ اور مضبوط دفاع کا فقدان ان کی ناؤ ڈبو بھی سکتا ہے۔

6۔ پرتگال

مضبوط پہلو:

کرسٹیانو رونالڈو کی موجودگی کے باوجود اس بڑے نام کے علاوہ بھی اسکواڈ میں بے پناہ ٹیلنٹ موجود ہے۔ برونو فرنانڈس اور روبن ڈیاس اٹیک اور دفاع، دونوں شعبوں میں توازن پیدا کرتے ہیں۔

کمزور پہلو:

جہاں کرسٹیانو رونالڈو ٹیم کی پہچان اور سہارا ہیں، وہیں ان کے کردار کو لے کر ٹیکٹیکل الجھن اور بڑے ٹورنامنٹس میں دباؤ نہ جھیل پانا اس ٹیم کی بڑی کمزوری بھی ہے۔

7۔ انگلینڈ

مضبوط پہلو:

دنیا کے چند بہترین اٹیکنگ کھلاڑی اور مڈفیلڈرز انگلش ٹیم کے پاس موجود ہیں۔ بوکایو ساکا اور مارکس رشفورڈ یورپی فٹ بال کے نمایاں ترین ناموں میں شمار ہوتے ہیں۔ جوڈ بیلنگھم، کپتان ہیری کین اور گول کیپر جورڈن پکفورڈ کی صورت میں تجربہ کار کھلاڑی بھی موجود ہیں، جو ٹیم کی طاقت ہیں۔

کمزور پہلو:

بڑے میچ جیتنے کی نفسیاتی کمزوری اور گول کیپنگ کے مسائل ان کی کمزوری ہیں۔ اگر میچ پنالٹی شوٹ آؤٹ تک چلا جائے تو انگلینڈ کا ریکارڈ تاریخی طور پر مایوس کن رہا ہے۔

دیکھتے ہیں اس بار مقدر کی دیوی کس پر مہربان ہوتی ہے؟ آپ کے خیال میں کون چیمپیئن بنے گا؟

تحریر:

محمد ثقلین کانجن