تحریر: محمد ثقلین کانجن
یہ ٹرافی دو بار چوری ہوئی۔ پہلی بار دوسری جنگِ عظیم کے دوران، جب اسے ہٹلر کی نازی فوج کے ہاتھ لگنے سے بچانے کے لیے ایک پرانے جوتوں کے ڈبے میں چھپا دیا گیا۔ بعد ازاں اسے لندن منتقل کیا گیا، مگر وہاں سے بھی یہ چوری ہو گئی۔ حیرت انگیز طور پر اسے پیکلز نامی ایک کتے نے ڈھونڈ نکالا۔ پھر جب برازیل تیسری بار عالمی چیمپئن بنا تو قانوناً یہ ٹرافی ہمیشہ کے لیے اس کی ملکیت بن گئی، لیکن چند برس بعد یہ پراسرار انداز میں ہمیشہ کے لیے غائب ہو گئی۔

اس کہانی کا آغاز 1930 میں ہوا، جب فیفا کے صدر جولز ریمے کی کوششوں سے پہلے فٹ بال ورلڈ کپ کا انعقاد ہوا۔ فاتح ٹیم کو دینے کے لیے فرانسیسی مجسمہ ساز ایبل لافلور نے ایک شاہکار تخلیق کیا۔ سونے اور چاندی سے بنی اس ٹرافی میں یونانی دیومالا کی فتح کی دیوی نائیکی کو ایک ہشت پہلو پیالہ اٹھائے ہوئے دکھایا گیا تھا۔

یہ صرف ایک ٹرافی نہیں، بلکہ دنیا میں فٹ بال کی بالادستی کی علامت تھی۔ فیفا کے بانی اور سابق صدر جولز ریمے نے یہ قانون بنایا تھا کہ جو بھی ملک تین مرتبہ ورلڈ کپ جیتے گا، وہ اصل ٹرافی مستقل طور پر اپنے پاس رکھنے کا حقدار ہوگا۔

1970 کے ورلڈ کپ میں برازیل نے اٹلی کو شکست دے کر اپنی تاریخ کا تیسرا عالمی ٹائٹل جیتا، اور قانون کے مطابق جولز ریمے ٹرافی ہمیشہ کے لیے برازیل منتقل کر دی گئی۔ لیکن افسوس یہ ٹرافی زیادہ دیر وہاں نہ ٹھہر سکی۔ 23 دسمبر 1983 کی ایک گرم اور مرطوب رات ایک پراسرار واقعہ رونما ہوا۔

اس رات ریو ڈی جنیرو میں واقع برازیلین فٹ بال فیڈریشن کی عمارت میں ہر طرف خاموشی تھی۔ اچانک اندھیرے سے چند سائے نمودار ہوئے۔ انہوں نے سیکیورٹی گارڈز کو رسیوں سے باندھ دیا، دیگر عملے کو گن پوائنٹ پر یرغمال بنایا، پھر لکڑی کے فریم میں نصب بلٹ پروف شیشے کو پیچھے سے توڑ دیا، جس کے اندر فیفا کی تاریخی ٹرافی رکھی تھی۔ چند لمحوں بعد وہ ٹرافی لے کر ریو ڈی جنیرو کی وسعتوں میں گم ہو گئے۔ یہ جولز ریمے ٹرافی کی آخری جھلک تھی، جس کے بعد وہ ہمیشہ کے لیے دنیا کی نظروں سے اوجھل ہو گئی۔

اس ٹرافی کی داستان کسی سسپنس تھرلر فلم سے کم نہیں تھی۔ دوسری جنگِ عظیم کے دوران فیفا کے اطالوی نائب صدر اوٹورینو باراسی نے اسے نازیوں کے ہاتھ لگنے سے بچانے کے لیے روم میں اپنے بستر کے نیچے ایک پرانے جوتوں کے ڈبے میں چھپا کر رکھا۔ پھر 1966 کے ورلڈ کپ سے چند ماہ قبل یہ ٹرافی لندن کی ایک نمائش سے چوری ہو گئی۔ پوری برطانوی پولیس ناکام رہی، لیکن ایک ہفتے بعد پیکلز نامی ایک عام پالتو کتے نے اسے ایک باغ کی جھاڑی میں اخبار میں لپٹی ہوئی حالت میں سونگھ کر ڈھونڈ نکالا اور راتوں رات ہیرو بن گیا۔

1970 میں پیلے کی جادوئی قیادت میں برازیل نے اٹلی کو شکست دے کر تیسری بار عالمی چیمپئن بننے کا اعزاز حاصل کیا، جس کے بعد جولز ریمے ٹرافی ہمیشہ کے لیے ریو ڈی جنیرو منتقل کر دی گئی۔

برازیلی عوام کے لیے یہ صرف ایک ٹرافی نہیں بلکہ قومی فخر، جذبے اور عظمت کی علامت تھی۔ لیکن 1983 کی اس چوری نے برازیل کا یہ فخر خاک میں ملا دیا۔ واردات اس قدر صفائی سے انجام دی گئی کہ انوسٹیگیشن کمیٹی بھی حیران رہ گئی۔ تفتیش کے دوران چار افراد کو گرفتار تو کر لیا گیا، مگر ٹرافی کا کہیں سراغ نہ مل سکا۔ بعد میں سب سے ہولناک دعویٰ سامنے آیا کہ چوروں نے فٹ بال کی تاریخ کے اس سنہری شاہکار کو پگھلا کر سونے کی اینٹوں میں تبدیل کر دیا اور انہیں فروخت کر دیا۔

یوں فٹ بال کی وہ علامت، جس نے کئی دہائیوں تک دنیا بھر کے شائقین کو اپنے سحر میں جکڑے رکھا، محض چند کلو سونے کی خاطر ہمیشہ کے لیے ختم کر دی گئی۔ بعد میں برازیل کو اس کی ہو بہو نقل بنا کر دے دی گئی، لیکن اصل جولز ریمے ٹرافی کا غائب ہو جانا آج بھی فٹ بال کی تاریخ کے سب سے بڑے اور پراسرار رازوں میں شمار ہوتا ہے۔