تحریر: محمد ثقلین کانجن
پہلی بار میں نے کین ولیمسن کا نام کرکٹ میگزین اسپورٹس لنک میں پڑھا تھا۔ وہ کون سا شمارہ تھا، یہ تو اب ٹھیک سے یاد نہیں، مگر اتنا آج بھی ذہن کے کسی نہاں خانے میں محفوظ ہے کہ اس میں اسٹیو اسمتھ، ویرات کوہلی، جو روٹ اور کین ولیمسن کو مستقبل کا اسٹار کہا گیا تھا۔ شاید یہ دو ہزار گیارہ کی بات ہے۔ پھر پوری دنیا نے دیکھا کہ کیسے یہ چاروں بلے باز افقِ کرکٹ پر درخشندہ ستارے بن کر ابھرے، جنہیں بعد میں مارٹن کرو نے 'فیبولس فور' (Fab Four) کا نام دیا۔

ابھی جب معلوم ہوا کہ کین_ولیمسن نے اچانک انٹرنیشنل کرکٹ سے ریٹائرمنٹ کا اعلان کر دیا ہے، تو ذہن کے دریچے سے یادوں کی پٹاری کھل گئی۔

کین ولیمسن کا کیریئر ہر لحاظ سے شاندار اور مثالی رہا۔ انہوں نے کرکٹ کے تمام فارمیٹس میں 19,346 رنز بنائے، جن میں 48 بین الاقوامی سنچریاں بھی شامل ہیں۔ یہ انہی کی کپتانی کا کمال تھا کہ نیوزی لینڈ نے بھارت کو ہرا کر 2021ء میں پہلی آئی سی سی ورلڈ ٹیسٹ چیمپئن شپ اپنے نام کی۔ کین کو نہ صرف ان کی جادوئی بلے بازی، بلکہ میدان میں ان کے دھیمے مزاج، عاجزی اور سچے 'جنٹلمین' والے رویے کی وجہ سے ہمیشہ یاد رکھا جائے گا۔ وہ ایک ایسے کھلاڑی تھے جنہوں نے کھیل کی دنیا میں شرافت کی ایک نئی شناخت ثبت کی۔

انہوں نے اپنے لازوال کیریئر میں کئی ایسی اننگز کھیلیں جنہوں نے نیوزی لینڈ کو ناقابل یقین فتوحات دلائیں۔ ان کی بیٹنگ کی اصل خوبصورتی دباؤ کے وقت پرسکون رہنا اور میچ کی صورتحال کے مطابق خود کو ڈھالنا تھا۔ جب بھی ٹیم پر مشکل وقت آتا، وہ کریز پر سیسہ پلائی ہوئی دیوار بن جاتے۔ 2015ء میں سری لنکا کے خلاف ایک ایسے ہی میچ میں انہوں نے دس گھنٹے کریز پر گزار کر شاندار ڈبل سنچری اسکور کی۔ 2019ء کے ورلڈ کپ میں ویسٹ انڈیز کے خلاف ان کے 148 رنز بھلا کون بھول سکتا ہے، جب کیویز کے دونوں اوپنرز صفر پر پویلین لوٹ چکے تھے۔ اسی طرح ورلڈ ٹیسٹ چیمپئن شپ کے فائنل کی چوتھی اننگز میں، جب پچ بولرز کی مدد کر رہی تھی اور ٹرافی کا اعصاب شکن دباؤ تھا، کین نے 52 رنز کی ناقابل شکست اننگز کھیل کر نیوزی لینڈ کو پہلی بار ٹیسٹ کا عالمی چیمپئن بنایا۔

وہ ایک سچے فائٹر تھے۔ دو ورلڈکپ فائنل مقابلے میں ہارے، مگر صبر و استقامت سے اپنی ٹیم کی بہتری کیلئے کھیلتے رہے۔ انہی کی بدولت آج نیوزی لینڈ کرکٹ ٹیم دنیا کی بہترین ٹیموں میں سے ایک ہے۔

آج انگلینڈ کے خلاف جاری ٹیسٹ سیریز کے دوران جب انہوں نے اچانک کرکٹ کو خیرباد کہا، تو محسوس ہو رہا ہے جیسے کرکٹ کا ایک سنہری اور پروقار باب بند ہو گیا ہے۔ کین ولیمسن! آپ کا میدان میں آنا، وہ دھیمی سی مسکراہٹ، وہ کلاسک کور ڈرائیوز اور ہار جیت سے بالاتر ہو کر کھیل کا احترام کرنا ہمیشہ یاد رہے گا۔

کرکٹ کو حسن، وقار اور بے پناہ یادیں دینے کا شکریہ، کین ولیمسن! زندگی کے اگلے سفر کے لیے نیک تمنائیں ۔۔

رحمان فارس نے "عشق بخیر" میں شاید کین کےلئے کہا تھا۔۔۔

~کہانی ختم ہوئی اور ایسی ختم ہوئی

کہ لوگ رونے لگے تالیاں بجاتے ہوئے

کالم نگار کا تعارف:
محمد ثقلین کانجن ایک مصنف، تجزیہ کار اور محقق ہیں، جنہوں نے بین الاقوامی تعلقات اور انگریزی ادب میں ماسٹرز کی ڈگری حاصل کر رکھی ہے۔ وہ گزشتہ دس برس سے زائد عرصے سے اردو اور انگریزی دونوں زبانوں میں مختلف موضوعات پر لکھ رہے ہیں۔

ان کی تحریروں کا دائرہ بین الاقوامی امور، سماجی مسائل، ادب، کھیل اور حالاتِ حاضرہ سمیت متعدد شعبوں پر محیط ہے۔ وہ اپنی تحریروں میں گہری تحقیق، متوازن تجزیے اور مؤثر اندازِ بیان کو یکجا کرتے ہیں، جس کے ذریعے قارئین کو عصری مسائل اور عالمی پیش رفت کے بارے میں واضح، جامع اور بصیرت افروز نقطۂ نظر فراہم کرتے ہیں۔