برازیل کی ہار اور لیاری کی گلیوں میں چھائی اداسی

تحریر: احسان اللہ

پانچ مرتبہ کی عالمی چیمپئن برازیل کا فیفا ورلڈ کپ سے باہر ہونا محض ایک ٹیم کی شکست نہیں، بلکہ اس حقیقت کا اعلان ہے کہ عالمی فٹبال میں اب صرف روایتی طاقتوں کی حکمرانی باقی نہیں رہی۔ ہر ورلڈ کپ نئی کہانیاں جنم دیتا ہے، نئے ہیروز سامنے لاتا ہے اور یہ ثابت کرتا ہے کہ ماضی کی کامیابیاں مستقبل کی ضمانت نہیں ہوتیں۔

برازیل دنیا کی کامیاب ترین فٹبال ٹیم ہے۔ پیلے رنگ کی جرسی، سامبا فٹبال، لاکھوں مداح اور چھٹے عالمی ٹائٹل کا خواب۔۔۔۔ ہر ورلڈ کپ میں برازیل انہی امیدوں کے ساتھ میدان میں اترتا ہے۔ اس بار بھی توقع یہی تھی کہ ٹیم کم از کم آخری مراحل تک ضرور پہنچے گی، لیکن ناروے نے ان تمام اندازوں کو غلط ثابت کر دیا۔

میچ کا آغاز ہی بتا رہا تھا کہ ناروے کسی دباؤ میں نہیں۔ برازیل نے گیند پر زیادہ کنٹرول رکھنے کی کوشش کی، مگر ناروے نے دفاعی نظم و ضبط، جسمانی طاقت اور تیز جوابی حملوں سے انہیں کھل کر کھیلنے کا موقع نہیں دیا۔ پہلے ہاف میں دونوں ٹیمیں گول نہ کر سکیں، لیکن کھیل کا معیار مسلسل بلند رہا۔

دوسرے ہاف میں بھی برازیل نے حملے کیے، مگر ناروے کا دفاع دیوار ثابت ہوا۔ ایسے مقابلوں میں ایک لمحہ پورا منظرنامہ بدل دیتا ہے، اور یہی لمحہ 79ویں منٹ میں آیا جب ارلنگ ہالینڈ نے موقع کو گول میں بدل کر برازیل پر دباؤ کئی گنا بڑھا دیا۔

گول کے بعد برازیل نے واپسی کی ہر ممکن کوشش کی، مگر جلد بازی، غلط فیصلوں اور ناروے کی منظم حکمت عملی نے انہیں کامیاب نہ ہونے دیا۔ میچ کے اختتامی لمحات میں ہالینڈ کا دوسرا گول دراصل برازیل کے خوابوں پر آخری مہر ثابت ہوا۔

فٹبال صرف تکنیک کا کھیل نہیں، ذہنی مضبوطی کا امتحان بھی ہے۔ ناروے نے ثابت کیا کہ اگر ٹیم منظم ہو، کھلاڑی اپنے منصوبے پر قائم رہیں اور مواقع سے بھرپور فائدہ اٹھائیں تو دنیا کی بڑی سے بڑی ٹیم کو بھی شکست دی جا سکتی ہے۔

شکست کے بعد برازیلین کھلاڑیوں کے چہرے سب کچھ بیان کر رہے تھے۔ کئی کھلاڑی میدان میں ہی آبدیدہ ہو گئے، جبکہ اسٹیڈیم میں موجود ہزاروں برازیلین مداح خاموشی اور آنسوؤں کے ساتھ اپنی ٹیم کو الوداع کہتے نظر آئے۔ دوسری جانب ناروے کے لیے یہ صرف ایک فتح نہیں بلکہ ان کی فٹبال تاریخ کا یادگار ترین لمحہ تھا۔

پاکستان، خصوصاً لیاری سمیت دنیا بھر برازیل کے کروڑوں چاہنے والوں کے لیے بھی یہ شکست کسی صدمے سے کم نہیں۔ لیاری کی گلیوں میں برسوں سے برازیل کی جرسی، اس کے پرچم اور اس کے اسٹار کھلاڑیوں سے محبت ایک روایت رہی ہے۔ یہی وجہ ہے کہ برازیل کی ہر جیت وہاں جشن اور ہر شکست اداسی لے کر آتی ہے۔

تاہم کھیل کا حسن بھی یہی ہے کہ یہاں جذبات سے زیادہ کارکردگی فیصلہ کرتی ہے۔ ناروے نے جس نظم، عزم اور اعتماد کے ساتھ کھیل پیش کیا، وہ اس کامیابی کا مکمل حق دار تھا۔ اس نے ثابت کیا کہ ورلڈ کپ میں صرف تاریخ نہیں، موجودہ فارم، درست حکمت عملی اور اعصاب کی مضبوطی بھی کامیابی کی کنجی ہوتی ہے۔

برازیل کا سفر ختم ہو گیا، لیکن اس شکست سے انہیں بہت کچھ سیکھنا ہوگا۔ دوسری جانب ناروے کے لیے اصل امتحان ابھی باقی ہے، کیونکہ کوارٹر فائنل میں ان کے سامنے مزید سخت چیلنجز ہوں گے، جوکہ ممکنہ طور پر انگلینڈ یا میکسکو ہو سکتے ہیں جس کا فیصلہ آج ہی ہو جائے گا۔

ورلڈ کپ کی یہی خوبصورتی ہے کہ یہاں ہر چار سال بعد کچھ خواب پورے ہوتے ہیں اور کچھ خواب ٹوٹ جاتے ہیں۔ اس بار برازیل کا خواب ٹوٹا، مگر ناروے نے اپنی تاریخ کا روشن ترین باب رقم کر دیا۔